Skip to main content
x
የመራሒተ መንግሥት አንገላ መርከል በምርጫ ማሸነፍና የቀኝ ጽንፈኞች ማንሰራራት አንድምታ

የመራሒተ መንግሥት አንገላ መርከል በምርጫ ማሸነፍና የቀኝ ጽንፈኞች ማንሰራራት አንድምታ

ላለፉት 12 ዓመታት ጀርመንን በመራሒተ መንግሥትነት እየመሩ ያሉት አንገላ መርከል በተፅዕኖ ፈጣሪነታቸው ይታወቃሉ፡፡ በአውሮፓ ኅብረትም ሆነ በዓለም አቀፍ ደረጃም ተደማጭ ናቸው፡፡ ችግሮችን በሰላም ለመፍታት ከሚያደርጉት ጥረት አንስቶ፣ በውሳኔ ሰጪነታቸውም ሆነ በቆራጥ አቋማቸው ይታወቃሉ፡፡ የአገሪቱ አጠቃላይ ምርጫ ከመደረጉ ቀናት አስቀድሞ ሲኤንኤን መርከልን አስመልክቶ በነበረው ፕሮግራም፣ በፌስቡክ ተሳታፊ ከነበሩ አስተያየት ሰጪዎች አብዛኞቹ ‹‹ለዓለም የምትገባ ቆራጥ መሪ›› ሲሉ ነበር የገለጿቸው፡፡

መርከል ሥልጣን ከያዙ ካለፉት 12 ዓመታት ወዲህ በተለይ በዓለም አቀፍ ደረጃ ምርቃት፣ በአገራቸው በተወሰኑ ዜጎች ደግሞ ውግዘት የገጠማቸው በስደተኞች ላይ ባላቸው አቋም ነው፡፡ በተለይ መካከለኛው ምሥራቅ በአብዮት በታመሰበትና ሶሪያ በተመሳቀለችባቸው ጊዜያት፣ የተፈናቀሉ ዜጎችን አውሮፓ መቀበል አለባት ብለው አቋም የያዙም ናቸው፡፡

በዚህ አቋማቸው በአገራቸው በሙስሊሞች ላይ ጥርጣሬ ያላቸው ቢነቅፏቸውም፣ ጀርመን ለስደተኞች በሯን ክፍት አድርጋለች፡፡ ከዚህ ጋር ተያይዞ የደኅንነት ጉዳዮችና የኢኮኖሚ ሁኔታም መርከልን በተደጋጋሚ ጊዜ ለትችት የዳረጉ ነበሩ፡፡ ሆኖም እሑድ መስከረም 14 ቀን 2010 ዓ.ም. በአገሪቱ በተደረገው ምርጫ ከዚህ ቀደም እንደነበረው በሰፊ ልዩነት ባይሆንም፣ ለአራተኛ ጊዜ የአገሪቱ መራሒተ መንግሥት ሆነው ተመርጠዋል፡፡

የመራሒተ መንግሥት አንገላ መርከል በምርጫ ማሸነፍና የቀኝ ጽንፈኞች ማንሰራራት አንድምታ
የአንገላ መርከል ደጋፊዎች የቀኝ ጽንፈኞችን በመቃወም አደባባይ ወጥተዋል

 

መርከል ከምርጫው በፊት በነበሩ አስተያየቶች በምርጫው ሊያሸንፉ እንደሚችሉ ተገምቶ የነበረ ቢሆንም፣ ሌሎች ፓርቲዎችም አንገት ለአንገት ሊተናነቋቸው እንደሚችሉ ተነግሮም ነበር፡፡ በተለይ ሙስሊም ስደተኞች ጀርመን መግባት የለባቸውም፣ ከተወሰኑ አገሮች የሚመጡ ስደተኞች ላይ ዕገዳ መጣል አለበት የሚለው ‹‹ኦልተርኔቲቭ ፎር ጀርመን›› (ኤኤፍዲ) በምርጫው 12.6 በመቶ ድምፅ በማግኘት ከሁለተኛው ዓለም ጦርነት ወዲህ በጀርመን ተወካዮች ምክር ቤት (ቡንደስታግ) በመግባት የመጀመርያው ቀኝ ጽንፈኛ ፓርቲ ሆኗል፡፡

እ.ኤ.አ. በ2013 የተመሠረተውና በአውሮፓ ኅብረትም ሆነ በስደትና በእስልምና ላይ አሉታዊ አቋም ያለው ኤኤፍዲ፣ በጀርመን ቡንደስታግ 94 መቀመጫዎችን የሚያገኝ ሲሆን፣ በአገሪቱ ከሚገኙት 16 ተወካዮች ምክር ቤትም በ13 ውስጥ አባላቱ መቀመጫ ይኖራቸዋል፡፡

መርከል ምንም እንኳን መራሒተ መንግሥት እንደሆኑ ቢቀጥሉም፣ ፓርቲያቸው ክርስቲያን ዴሞክራቲክ ፓርቲ በ70 ዓመት ታሪክ አጋጥሞት የማያውቀውን ዓይነት ውጤት እንዳገኘ ቢቢሲ ዘግቧል፡፡

በቡንዳስታጉ ከፍተኛውን መቀመጫ የሚያገኘው ፓርቲያቸው ቢሆንም፣ በፓርቲው ታሪክ እንዲህ ዝቅ ያለ ድምፅ መገኘቱ ጀርመናውያን ሌሎች ፓርቲዎችን ማማተር መጀመራቸውን ያሳያል ተብሏል፡፡

በተለይ የስደተኞችና የእስልምና እምነት ተከታዮች ጀርመናውያን አይደሉም ብለው በሚያከሩ ጀርመናውያን ዘንድ መርከል ያላቸው ተቀባይነት እያሽቆለቆለ ነው፡፡ በምርጫው ከተወዳደሩት ፓርቲዎች የመርከል ሲዲዩ/ሲኤስዩ 33 በመቶ፣ ኤስፒዲ 20.5 በመቶ፣ ኤኤፍዲ 12.6 በመቶ፣ ኤፍዲፒ 10.7 በመቶ፣ ሌፍት 9.2 በመቶ፣ እንዲሁም ግሪንስ 8.9 በመቶ አግኝተዋል፡፡

የመርከል ፓርቲ 33 በመቶ ድምፅ ቢያገኝም ፓርቲያቸው እ.ኤ.አ ከ1949 ወዲህ ያገኘው አስቀያሚ ውጤት ተብሏል፡፡ በአገሪቱ ፓርላማ ካሉት 709 መቀመጫዎች የመርከል ሲዲዩ ከዚህ ቀደም ከነበረው 65 መቀመጫ በመቀነስ 246፣ ኤስፒዲ 40 በመቀነስ 153፣ ሌፍት 5 በመቀነስ 69፣ ግሪን 4 በመቀነስ 67 ሲያገኙ፣ ከዚህ ቀደም መቀመጫ ያልነበራቸው ኤፍዲፒ እና ኤኤፍዲ በተከታታይ 80 እና 94 መቀመጫዎችን ያዘዋል፡፡

የኤኤፍዲ ውጤት ለምን ቀልብ ሳበ?

ቀኝ ጽንፈኛው ኤኤፍዲ ከተመሠረተ አራት ዓመቱ ሲሆን፣ በአጭር ጊዜ ውስጥም በጀርመናውያኑ ዘንድ ተደማጭ ሆኗል፡፡ ለዚህ ዋና ምክንያቱ ጀርመን ለስደተኞች በሯን መክፈቷን መቃወሙና እስልምና የሚለውን ሳይሆን ጀርመናዊነትን ማቀንቀኑ ነው፡፡ ከሌሎቹ ፓርቲዎች በተለየም እንደ ናዚ የከረረ ባይሆንም ዘረኝነቱ ይንፀባረቅበታል፡፡

ምንም እንኳን አብዛኞቹ ጀርመናውያንና መንግሥት ናዚን የሚያወግዙና እንደማይወክላቸው በተለያዩ መገናኛ ብዙኃን የሚናገሩ ቢሆንም፣ ይህን የሚደግፉም ጥቂት አይደሉም፡፡ ለኤኤፍዲም እንዲህ ዓይነት አመለካከት ያላቸው ሰዎች የጀርባ አጥንት ናቸው፡፡ ቀኝ ጽንፈኝነቱ ይመቻቸዋል፡፡

ጀርመንና ጀርመናውያን የሚል አቋም ያለው ፓርቲው በአገሪቱ ፓርላማ 94 መቀመጫ የሚኖረው ሲሆን፣ ይህም ለመጀመርያ ጊዜ ነው፡፡ በምርጫ ቅስቀሳ ወቅት መርከል እ.ኤ.አ. በ2015 የጀርመንን በር ማስረጃ ለሌላቸው ስደተኞች መክፈታቸውን፣ ስደተኞቹም ከመካከለኛው ምሥራቅ የሚመጡ መሆኑን ሲያወግዝ ነበር፡፡ ቢመረጥም በዚህ ጉዳይ መንግሥትን እንደሚገዳደር ሲያስታውቅ ቆይቷል፡፡

በአሌክሳንደር ጎውላንድ የሚመራው ኤኤፍዲ ፓርቲ የሙስሊም ባህል ከጀርመን ጋር አይሄድም የሚል አቋምም አለው፡፡ በዚህ አቋሙ በተለይ በፊት በምሥራቅ ጀርመን 21.5 በመቶ ድምፅ በማግኘት ካሉት ተወዳዳሪ ፓርቲዎች ሁለተኛውን ደረጃ ይዟል፡፡ በሳክሶኒ ደግሞ ከመርከል ፓርቲ በጠባብ ልዩነት በልጦ 27 በመቶ ድምፅ አግኝቷል፡፡

የመራሒተ መንግሥት አንገላ መርከል በምርጫ ማሸነፍና የቀኝ ጽንፈኞች ማንሰራራት አንድምታ
ፀረ ስደተኞቹ የቀኝ ጽንፈኛው ፓርቲ ደጋፊዎች

 

ምርጫውን ተከትሎ ንግግር ያደጉት መርከል፣ የእሳቸውን ፓርቲ ከድተው ለኤኤፍዲ ድምፅ የሰጡ መራጮችን ልብ ለመመለስ እንደሚፈልጉ ገልጸዋል፡፡

የቀኝ ጽንፈኛው ኤኤፍዲ መሪ ግን ከመርከል የተለየ አቋም በማንገብ፣ ‹‹በውጭ ኃይሎች መወረራችንን እንዋጋለን፤›› ሲሉ ተናግረዋል፡፡ ጀርመን የተለየ ፖሊሲ እንደሚያስፈልጋትም ጎውላንድ አክለዋል፡፡

ናሽናል ሪቪው እንደሚለው፣ የኤኤፍዲ አቋም ለአራተኛ ጊዜ መንግሥት የሚመሠርቱትን መርከል የሚፈትን ነው፡፡ እ.ኤ.አ. ከ1857 ወዲህም በጀርመን ተወካዮች ምክር ቤት (ቡንደስታግ) ስድስት ፓርቲዎች ሲገቡ ይህ የመጀመርያው ነው፡፡

የመርከል ሲዲዩና የክርስቲያን ሶሻል ዩኒየኑ ሲኤስዩ መንግሥት ለመመሥረት በሚያስችላቸው ውህደት ላይ ቢሆኑም፣ ሁለት አዳዲስ ፓርቲዎች በሕዝብ ተወካዮች ምክር ቤት መቀመጫ አግኝተዋል፡፡ ይህም ጥምር መንግሥት የመመሥረቱን ሒደት ያወሳስበዋል፡፡

መርከል በንግግራቸው፣ የኤኤፍዲ መራጮች ጭንቀት እንደገባቸውና ይህንንም ለማርገብ እንደሚሠሩ ገልጸዋል፡፡ ኤኤኤፍዲን አስመልክቶ በተሠራ ቅድመ ምርጫ 91 በመቶ መራጮች የእስልምና ጫናን እንደሚፈሩ ሲናገሩ፣ 95 በመቶ ያህሉ ጀርመን ባህሏንና ቋንቋዋን ታጣለች የሚል ሥጋት እንደገባቸው ተናግረዋል፡፡ በአገር አቀፍ ደረጃ ደግሞ 60 በመቶዎቹ የኤኤፍዲ ደጋፊዎች በሌሎች ፓርቲዎች ተስፋ እንደቆረጡ አስታውቀዋል፡፡

መርከል እነዚህን ሥጋቶች ለማጥበብ እሠራለሁ ቢሉም፣ የጀርመን የፍትሕ ሚኒስትር ሂኮ ማስ የኤኤፍዲ አካሄድና የመራጮቹ ፍላጎት ከጀርመን ሕገ መንግሥት ጋር አይሄድም ብለዋል፡፡ ይህ በሆነበት ሁኔታ የኤኤፍዲ አባላት የሕዝብ ተወካዮች ምክር ቤት የሚገቡ ሲሆን፣ ይህም ለመርከል ፈተና ይሆናል ተብሏል፡፡