Skip to main content
x
የክቡር ሚኒስትሩ ሾፌር የቴዲ አፍሮ ዘፈን እየሰማ ክቡር ሚኒስትሩ መኪና ውስጥ ገቡ

የክቡር ሚኒስትሩ ሾፌር የቴዲ አፍሮ ዘፈን እየሰማ ክቡር ሚኒስትሩ መኪና ውስጥ ገቡ

[የክቡር ሚኒስትሩ ሾፌር የቴዲ አፍሮ ዘፈን እየሰማ ክቡር ሚኒስትሩ መኪና ውስጥ ገቡ]

  • አንተ ፀረ ሰላም ሆነሃል መሰለኝ?
  • ምን አጠፈሁ ክቡር ሚኒስትር?
  • ዝም ብዬ ሳስብ ፀረ ልማትም ትመስለኛለህ፡፡
  • በጠዋቱ ምን ሆኑ ክቡር ሚኒስትር?
  • አንተ በጠዋቱ ምን ሆንክ ልበል እንጂ?
  • ኧረ እኔ ምንም አልሆንኩም፡፡
  • ምን እየሰማህ ነው?
  • ‹ኢትዮጵያ› የሚለውን የቴዲ አፍሮ ሲዲ ነዋ፡፡
  • እሱን ዘፈን መኪናዬ ውስጥ ማን ክፈት አለህ?
  • እንዴ ክቡር ሚኒስትር መኪናው የእርስዎ መሆኑን አላውቅም ነበር፡፡
  • ምን አልክ አንተ?
  • ማለቴ መኪናው መሥሪያ ቤቱ የመደበለዎት የመንግሥት ንብረት መስሎኝ?
  • አንተን ማን ንብረት ተቆጣጣሪ አደረገህ?
  • ኧረ ምን ቆርጦኝ?
  • ታዲያ ምን ያስቀባጥርሃል?
  • ክቡር ሚኒስትር እኔ ግን ኢሕአዴግን ሳስበው አንዳንድ ጊዜ ግርም ይለኛል፡፡
  • ምኑ ነው የሚገርምህ?
  • ያው በቃ ራሱ እግር ላይ መተኮስ ያበዛል፡፡
  • እሺ የእኔ ፈላስፋ?
  • እውነቴን ነው ክቡር ሚኒስትር፣ አንዳንዴ የኢሕአዴግ ጠላት ራሱ ኢሕአዴግ ይመስለኛል፡፡
  • ዛሬማ የፖለቲካ ተንታኝም ለመሆን ይዳዳሃል?
  • የፖለቲካ ተንታኝ ለመሆን ፈልጌ ሳይሆን ዊኬንድ ላይ የተፈጸመው ነገር አስገርሞኝ ነው፡፡
  • ዊኬንድ ላይ ምን ተፈጸመ?
  • የቴዲ አፍሮ የአልበም ምረቃ መሰረዘ አስገርሞኝ ነዋ፡፡
  • ምኑ ነው የሚገርመው?
  • እንዴ መንግሥት እንደዚህ ወርዶ ከዘፋኙ ጋር እስጥ አገባ ሲገባ አይገርምም?
  • ለመሆኑ አንተ ስምህ ከእሱ ጋር ሞክሼ ስለሆነ ነው እንደዚህ የምትከራከርለት?
  • አንዳንዴ የመንግሥት አካሄድ ግራ ስለሚያጋባ ነው፡፡
  • ምኑ ነው ግራ የሚያጋባው?
  • አንዳንዶቹ ቴዲን የፍቅር ሰባኪ ነው ይሉታል፡፡
  • አንተም የፍቅር ሰባኪ ነው ብለህ ታምናለህ?
  • ክቡር ሚኒስትር በልጁ ፍቅር ያልተነደፈ ማን አለ?
  • እኔ፡፡
  • እንግዲህ ሊሆን ይችላል፣ ግን መንግሥት የፍቅር ቀን አከብራለሁ እያለ እንዲህ ዓይነት ከፍቅር የጎደለ ድርጊት ሲያደርግ ትንሽ ግር ይላል፡፡
  • በነገራችን ላይ እኛም ሕዝቡን እንዴት በፍቅር ልንነድፈው እንችላለን?
  • ኪኪኪ. . .
  • ምን ታገጣለህ?
  • መስተፋቅር አሠሩዋ፡፡
  • ቀልደህ ሞተሃል፡፡
  • የምሬን ነው እሱን ብትሞክሩት ይሻላችኋል፡፡
  • ወሬኛ ቢጤ ነህ፡፡
  • ለማንኛውም አንድ የናጠጠች ሀብታም አክስት አለችኝ፡፡
  • እና ምን ይጠበስልህ?
  • ጠዋት ደውላ እርስዎን እንዳማክርዎት ነግራኝ ነበር፡፡
  • ምንድነው የምታማክረኝ?
  • በሚቀጥለው ሳምንት ድል ያለ ድግስ ትደግሳለች፡፡
  • ታዲያ እኔን የድግስ አማካሪ ነው ያላት ማነው?
  • ያው እርስዎ ብዙ ድግስ ስለሚደግሱ ቢያማክሯት ምን ችግር አለው?
  • አንተ ግን እንዴት ነው የናቅከኝ?
  • ለማንኛውም ስለድግሱ እንዲያማክሯት ሳይሆን የልጇ ምርቃት እንዳይበላሽባት ስለፈራች እርስዎ እንዲያሰጧት ነው፡፡
  • ምንድነው የማሰጣት?
  • የምርቃት ፈቃድ!

[አንድ ደላላ ለክቡር ሚኒስትሩ ስልክ ደወለላቸው]

  • ሄሎ ክቡር ሚኒስትር፡፡
  • እንዴት ነህ?
  • ምን እየተሠራ ነው ክቡር ሚኒስትር?
  • ግድብ፣ መንገድ፣ ባቡር. . . ኧረ ስንቱ?
  • አሁን ጋዜጣ አንብቤ ነው የምደውልልዎት፡፡
  • እነሱ ከወሬ ውጪ ምን ያውቃሉ ብለህ ነው? ደግሞ ምን አሉ?
  • ክቡር ሚኒስትር አሁን እርስዎ ምን አጠፉ?
  • ምን አጠፋ ብለው ጻፉ ደግሞ?
  • ማለቴ የሚኒስትር ሚስት በቪ8 ብትሄድ ምን አለበት?
  • ሲያንሳት ነው፡፡
  • የሚኒስትር ልጆች ፓጃሮ ቢነዱ ምኑ ነው ችግሩ?
  • እንዳንተ የሚያስብ እኮ ነው ያጣነው፡፡
  • ክቡር ሚኒስትር በእውነት በእጅጉ ነው ያዘንኩት፡፡
  • ምን ታደርገዋለህ ይኸው መመርያ ወጣብን፡፡
  • በጣም ደግሞ ያስገረመኝ ከተማው ውስጥ በቪ8 ምናምን መንቀሳቀስ አትችሉም የተባለው ነው?
  • እንግዲህ ሁሌ ከከተማ እየወጣን እንድንገናኝ ሊያስገድዱን ነው?
  • ለማንኛውም አንድ ሐሳብ ይዤ ነው የደወልኩት፡፡
  • የምን ሐሳብ?
  • መመርያው ላይ ከዚህ በኋላ የመንግሥት መሥሪያ ቤቶች የአገር ውስጥ መኪና ብቻ እንዲገዙ መባሉን አንብቤያለሁ፡፡
  • ልክ ነው ወዳጄ፡፡
  • ታዲያ ለምን አናቋቁምም?
  • ምን?
  • መኪና መገጣጠሚያ!

[ክቡር ሚኒስትሩ በደላላው በኩል የመኪና መገጣሚያ ለማቋቋም ፍላጎት ያለውን ባለሀብት በአንድ ትልቅ ሆቴል አገኙት]

  • ክቡር ሚኒስትር ስለተገናኘን በጣም ተደስቻለሁ፡፡
  • እኔም በጣም ደስተኛ ነኝ፡፡
  • ክቡር ሚኒስትር መኪና መገጣጠሚያ ፋብሪካውን ለማቋቋም አንዳንድ መሟላት ያለባቸው ነገሮች አሉ፡፡
  • ምን ዓይነት ነገሮች?
  • ለምሳሌ ሰፊ የሆነ መሬት ያስፈልገናል፡፡
  • ስለእሱ ምንም አታስብ፡፡
  • ከዚያ ባለፈ ፋብሪካውን የምናቋቁምበት ብድር ከባንኮች ማግኘት አለብን፡፡
  • እሱንም በአጭር ጊዜ ማግኘት እንችላለን፡፡
  • ከዚያ ውጪ ያለውን ነገር ለእኔ ተውት፡፡
  • በአጭር ጊዜ ፋብሪካውን ዕውን ማድረግ እንችላለን ማለት ነው?
  • ክቡር ሚኒስትር በእርስዎ በኩል ያሉትን ነገሮች ካመቻቹ በአጭር ጊዜ ወደ ሥራ እንገባለን፡፡
  • ሌላ ምን ያስፈልጋል?
  • ፋብሪካው እንደ ተቋቋመ የመንግሥት መኪኖች ከእኛ ብቻ እንዲገዙ ማድረግ ነው፡፡
  • ቢያንስ የእኔ መሥሪያ ቤት መኪኖች ሙሉ ለሙሉ ከዚያ ፋብሪካ እንዲገዙ አደርጋለሁ፡፡
  • እንደዛ ከሆነ በአጭር ጊዜ እንከብራለን ክቡር ሚኒስትር፡፡
  • በከፍታ ዘመኑ ከፍ ማለት ነው እንግዲህ፡፡
  • ከፍ ለማለት ምን ይፈልጋሉ?
  • ፎቅ!

[ክቡር ሚኒስትሩ ቤት ለምሳ ሄደው ከሚስታቸው ጋር እያወሩ ነው]

  • ነገ የተሳልኩትን ዣንጥላ ማስገባት አለብኝ፡፡
  • የምን ስለት ነው?
  • እሱ የከፈተውን ጉሮሮ እሱ ይሞላዋል ብዬ ተደፍቼ ነበር የፀለይኩት፡፡
  • የምን ፀሎት ነው የምታወሪው?
  • እንዴ መንግሥት መኪናዬን ሲቀማኝ ወጪ ቆጥቡ ምናምን ብሎ ሁሉን ነገር ሲያስቀረው የምገባበት ጠፍቶኝ ነበር፡፡
  • አሁን ምን ተገኘ ታዲያ?
  • ይኸው የከፍታ ዘመን ታወጀ አይደል እንዴ?
  • ለከፍታ ዘመን እኮ ከመንግሥት ካዝና ምንም አይነካም፡፡
  • ከግሉስ ቢሆን ዋናው የእኛ አካውንት ከፍ ማለቱ ነው፡፡
  • ምን አስበሽ ነው?
  • ስማ የፍቅር ቀን ተብሎ ሲከበር ብዙ ገንዘብ ማግኘት እንችላለን፡፡
  • እኮ እንዴት?
  • መቼም ፍቅር ሁሌም ቢሆን ከአበባ ጋር የተገናኘ ነው፡፡
  • እሱስ ልክ ነሽ፡፡
  • ስለዚህ ሁሉም መሥሪያ ቤቶች በፍቅር ቀን አበባ የሚገዙት ከእኔ ይሆናል፡፡
  • አይ አንቺ ምን ላድርግሽ?
  • ከፍቅር ጋር አያይዘን ሁሉንም የመንግሥት መሥሪያ ቤቶች እናሸበርቃቸዋለን፡፡
  • ለዲኮር ቤትሽ ሥራ ተገኘለት ማለት ነው?
  • ለቫለንተይንስ ዴይ የሠራነውን ገንዘብ ረሳኸው እንዴ?
  • እሱ ቀን የኒዮሊበራሎች ስለሆነ አልወደውም፣ ለዛም ነው መንግሥት በራሱ የፍቅር ቀን ብሎ የሰየመው፡፡
  • የሰላም ቀን ሲከበር ደግሞ ነጭ ባንዲራ እንቸበችባለን፡፡
  • በነገራችን ላይ ይህ ሥራ ፈጣሪ ጭንቅላትንሽን በጣም ነው የማደንቀው፡፡
  • ምን እሱ ብቻ?
  • ሌላ ምን አለአለ?
  • ሰው ለሰላም ቀን ነጭ መልበስ ስላበት ሁሉም ሠራተኛ የአገር ልብስ እንዲገዛኝ ታስደርገዋለህ፡፡
  • ይኼ ደግሞ የአገር ባህል ልብስ ቤትሽን ገበያ ያደራዋል፡፡
  • እሱን ነው የምልህ፡፡
  • በእውነት ኮራሁብሽ፡፡
  • አሁን ገበያችን ሁሌ እንዲደራ አንድ ነገር ማድረግ አለብህ፡፡
  • ምን?
  • እነዚህ የፍቅርና የሰላም ቀናት በዓመት አንዴ ብቻ መከበር የለባቸውም፡፡
  • ታዲያ ስንቴ ይከበሩ?
  • ሁልቀን!

[ክቡር ሚኒስትሩ አማካሪያቸውን ቢሮ አስጠሩት]

  • አቤት ክቡር ሚኒስትር?
  • የከፍታ ዘመን እንዴት ማምጣት እንችላለን?
  • ሙስናን በማጥፋት፣ መልካም አስተዳደርን በማስፈን፣ ድህነትን በመቀነስ፣ ዴሞክራሲን በማስፈን፣ ልማትን በማፋጠን፣ እንዲሁም በሌሎች፡፡
  • አንተ ፀረ ልማት ነህ መሰለኝ፡፡
  • ምነው ክቡር ሚኒስትር?
  • መንግሥት የከፍታ ዘመናችንን የምናውጀው የተለያዩ ቀናትን በማክበር ነው ብሏል፡፡
  • እሱንማ አውቃለሁ፡፡
  • ስለዚህ አሁን የምልህን ብቻ አድርግ፡፡
  • ምን ክቡር ሚኒስትር?
  • የፍቅር ቀንን በደመቀ ሁኔታ እናከብረዋለን፡፡
  • እኮ እንዴት?
  • አበባና ሻማ ይገዛል፡፡
  • እሺ?
  • ከዚያም መሥሪያ ቤታችን በቀይ አበባና በሻማ ያሸበርቃል፡፡
  • እ. . .
  • ሠራተኛው ምሳውን ሲበላ ራቱን የበላ እስኪመስለው ድረስ መሥሪያ ቤቱ በሻማና በአበባ ይዋብ፡፡
  • አልገባኝም ክቡር ሚኒስትር?
  • በቃ ሠራተኛው እርስ በርሱ በጥልቅ ፍቅር እንዲወድቅ ማድረግ አለብን፡፡
  • እ. . .
  • እንዲያውም ወይን ራሱ ከፍቅር ጋር ስለሚሄድ እንገዛለን፡፡
  • ከየት?
  • እነዚህ ያልኩህን ሁላ የሚያቀርብልን ድርጅት አግኝቻለሁ፡፡
  • ያለጨረታ ነው የምንገዛው?
  • ያዘዝኩህን ብቻ ፈጽም፡፡
  • ክቡር ሚኒስትር መንግሥት ካወጣቸው ቀናት በተጨማሪ የሚከበር ቀን አለ እንዴ?
  • የምን ቀን?
  • የሙስና ቀን!