Skip to main content
x
ለክቡር ሚኒስትሩ አንድ ዳያስፖራ ከውጭ ደወለላቸው

ለክቡር ሚኒስትሩ አንድ ዳያስፖራ ከውጭ ደወለላቸው

[ለክቡር ሚኒስትሩ አንድ ዳያስፖራ ከውጭ ደወለላቸው]

ሄሎ ክቡር ሚኒስትር፡፡
ማን ልበል?
አያውቁኝም ክቡር ሚኒስትር?
በሰሞኑ የሙስና ግርግር ከአገር የወጣህ ነህ?
ኧረ ከአገር ከወጣሁ ቆይቻለሁ፡፡
ማን ልበል ታዲያ?
ከጣሊያን ነው የምደውልልዎት፡፡
ከዚያ ደግሞ ገንዘብ ማን ላከልኝ?
ኧረ ገንዘብ ተልኮልዎት አይደለም ክቡር ሚኒስትር፡፡
ታዲያ ምን ፈልገህ ነው የደወልከው?
ጥያቄ ልጠይቅ ነው የደወልኩት፡፡
የምን ጥያቄ ነው?
መንግሥት ምን እየሠራ ነው?
አንተ የአውሮፓ ኅብረት ተወካይ ነህ?
ምነው ክቡር ሚኒስትር?
ማን ሆነህ ነው ይኼን ጥያቄ የምትጠይቀኝ?
ኧረ እኔ በኢትዮጵያዊነቴ ነው የምጠይቅዎት፡፡
መንግሥት ምን እየሠራ እንደሆነ ለማወቅ ከፈለግክ አገርህ መምጣት ትችላለህ፡፡
እንዳልመጣማ የጥገኝነት ወረቀቴ አላለቀልኝም፡፡
አገርህን ክደህ ታዲያ እንዴት ስለመንግሥት ትጠይቀኛለህ?
ክቡር ሚኒስትር አገሬን የምክደው ወድጄ ሳይሆን ተገድጄ ነው፡፡
ማን ነው ያስገደደህ?
ድህነት ነዋ፡፡
ስማ አገሪቷ በ11 በመቶ ዕድገት እየተምዘገዘገች መሆኗን አታውቅም እንዴ?
ሲባልማ ሰምቻለሁ፡፡
ለመሆኑ ከአገር ከወጣህ ምን ያህል ጊዜ ሆነህ?
አሥር ዓመት አልፎኛል፡፡
በቃ አሁን መጥተህ ብታያት ኢትዮጵያ ጣሊያንን ታስንቃለች፡፡
ለነገሩ መናቃችንንም ሰሞኑን በተፈጸመው ድርጊት አረጋግጫለሁ፡፡
ማን ነው የናቀን?
ጣሊያኖቹ ናቸዋ፡፡
ስማ ጣሊያንን ቀጥቅጠን እንዳባረርነው ረሳኸው እንዴ?
እሱማ የዓድዋ ድል ከእኛም አልፎ የጥቁር ሕዝብ ኩራት ነው፡፡
ታዲያ ይኼን እያወቅክ እንዴት ተናቅን ትላለህ?
ይኼ አባቶቻችን የሠሩት ታሪክ ነዋ፡፡
እኛም ቢሆን መድገማችን መቼ ይቀራል?
ክቡር ሚኒስትር ሰሞኑን በዜጎቻችን ላይ የተፈጸመው ግን ከሚያወሩት ጋር አብሮ የሚሄድ አይደለም፡፡
ሰሞኑን ምን ተፈጸመ?
ይኸው የጣሊያን መንግሥት በኢትዮጵያውያን ስደተኞች ላይ ከፍተኛ ግፍ እየፈጸመ ነው፡፡
ሰው ከአገር የሚሰደደው ለምንድነው?
ችግር ነዋ፡፡
እንዴ ምንድነው የሚቸግረው?
ክቡር ሚኒስትር አብዛኛው ወጣት በአገሪቱ ተስፋ ቆርጦ እኮ ነው ባህር የሚሻገረው፡፡
ይኸው በአነስተኛና ጥቃቅን ወጣቱ እንዲደራጅ እያደረግን እይደል እንዴ?
እ. . .
ከዚያም በላይ ለወጣቶች የተለየ ፈንድ አዘጋጅተን ሥራ ፈጣሪዎች እያደረግናቸው አይደል እንዴ?
ኧረ ክቡር ሚኒስትር እኔ እንደሰማሁዎት ሌላ ሰው እንዳይሰማዎት?
አንተ ፀረ ልማት ነህ መሰለኝ?
ለማንኛውም ክቡር ሚኒስትር በዜጎቻችን ላይ የተሠራውን ግፍ መንግሥት እንዲያወግዘው ለመናገር ነው የደወልኩት፡፡
የስደተኞቹን ሠልፍ የጣሊያን ፖሊስ በውኃ መበተኑ ነው ግፍ የምትለው?
ከእኛ አገር ጋር አነፃፅረው ነው ግፍ ያለመሰለዎት?
እንዲያውም ስደተኞቹ ፖሊሶቹን ማመስገን ይገባቸዋል፡፡
ለምን?
ውኃውን ስላላፈሉት!
[ለክቡር ሚኒስትሩ አንድ ኮንትራክተር ይደውልላቸዋል]

ሄሎ ክቡር ሚኒስትር፡፡
እንዴት ነህ እባክህ?
ሰላም ነኝ ክቡር ሚኒስትር፡፡
ሥራ እንዴት ነው?
ስለሥራ ጉዳይ ላወራዎት ነው የደወልኩት፡፡
የእኔና የአንተ ሥራ አይገናኝም እኮ፡፡
አውቃለሁ ግን መንግሥት ምን እየሠራ ነው ለማለት ነው፡፡
ምነው መንገድ መሥራት አቆመ እንዴ?
አዎና ክቡር ሚኒስትር፡፡
ይኸው በቅርቡ አይደል እንዴ የ2010 በጀት ያፀደቅነው?
ቢፀድቅ ምን ዋጋ አለው?
ምን ተፈጠረ?
ሥራ እኮ ቆሟል፡፡
በሰሞኑ ግርግር ምክንያት ነው?
ኧረ በፍፁም፡፡
ታዲያ በምን ምክንያት ነው ሥራ የቆመው?
ለእኔም ግራ ገብቶኛል ክቡር ሚኒስትር፡፡
አሁን እኔንም ግራ እያጋባኸኝ ነው፡፡
የሚፈርም ሰው እኮ የለም ክቡር ሚኒስትር፡፡
አልገባኝም፡፡
ሥራ ሠርተን ከጨረስን በኋላ የሚፈርም ባለሥልጣን ስላጣን ገንዘባችንን መቀበል አቅቶናል፡፡
እ. . .
ማንኛውም የመንግሥት ሠራተኛ መፈረም አቁሟል፡፡
ለምን?
በቃ በሰሞኑ የሙስና ዘመቻ ፍራቻ ሰዎች መፈረም አቁመዋል፡፡
እውነታቸውን ነዋ፡፡
እንዴ ከአቴንዳስ ውጪ ሌላ ወረቀት ላይ መፈረም ያቆሙ ነው የሚመስለው፡፡
ታዲያ በኋላ ማን ይገባል?
ክቡር ሚኒስትር እኔ እኮ በሀቀኝነት የምሠራ ኮንትራክተር ነኝ፡፡
ስማ ማንም ሰው እስኪጣራ መንገላታት አይፈልግም፡፡
እኔ እኮ አሁን ሥራ እንዳቆም እየተገደድኩ ነው፡፡
ከሰሞኑ የሥራ ማቆም አድማ ጋር በተገናኘ ነው?
ኧረ ለሠራተኞቼ ደመወዝ መክፈል ባለመቻሌ ነው፡፡
አይ እንዳዛ ከሆነ ይቻላል፡፡
ምኑ ክቡር ሚኒስትር?
ሥራ ማቆሙ ነዋ፡፡
ለምን?
ልማታዊ ሥራ ማቆም ስለሆነ!
[ክቡር ሚኒስትሩን አንድ የውጭ ባለሀብት ሆቴል ይቀጥራቸዋል]

ክቡር ሚኒስትር ስለመጡ በጣም አመሰግናለሁ፡፡
አንተ ግን ምን ሆነህ ነው?
ምን አጠፋሁ ክቡር ሚኒስትር?
በዚህ ወቅት እንዴት እንደዚህ ዓይነት ቦታ ትቀጥረኛለህ?
ምነው ሆቴሉን አልወደዱትም?
በዚህ ወቅት ከውጭ ባለሀብት ጋር መታየት ስለማያዋጣ ነዋ፡፡
ምን ላድርግ አስቸኳይ ነገር ገጥሞኝ ነው፡፡
ታዲያ ቢያንስ ቢያንስ እኔን ዱባይ መቅጠር ያቅተሃል?
ለነገሩ እዚያም መገናኘት እንችል ነበር፣ ግን ያው ጉዳዩ አስቸኳይ ስለሆነ ነው፡፡
ለመሆኑ ምን ፈልገህ ነው?
ክቡር ሚኒስትር ስለጨረታው ጉዳይ ለማውራት ነው፡፡
አንተ ሰውዬ ጤነኛ አይደለህም አይደል?
ምነው ክቡር ሚኒስትር?
ስማ እንደዚህ ዓይነት ነገር እዚህ ቦታ ማውራት ለእኔ ጥሩ አይደለም፡፡
አጭር ደቂቃ እኮ ነው የምንወያየው?
ስማ እዚያ ጋ ያፈጠጡብንን ሰዎች ታውቃቸዋለህ?
ክቡር ሚኒስትር እኔ እኮ የውጭ አገር ዜጋ ነኝ፣ እዚህ አገር ብዙ ሰው አላውቅም፡፡
ቆይ ጨረታውን ተወዳድረሃል አይደል?
ጨረታውንማ ተሳትፌ ብዙ ርቀት ተጉዣለሁ፡፡
ታዲያ ምን ልርዳህ?
እርስዎ የሰጡኝ ሰዎችም ጨረታውን እንዳሸንፍ አድርገውኛል፡፡
ኧረ አንተ ሰውዬ ዝም ብለህ አፍህን አትክፈት፡፡
 ይቅርታ ክቡር ሚኒስትር ስለጉዳዩ ለማስረዳት ብዬ ነው፡፡
እዚያ ጋ የተቀመጡት ሰዎች አላማሩኝም ዝም ብለው እያዩን ነው፡፡
ክቡር ሚኒስትር ለማንኛውም አሁን አንድ ነገር ነው የቀረኝ፡፡
ምን?
ጨረታውን ስለማሸነፌ እርስዎ በፊርማዎ ማረጋገጥ አለብዎት፡፡
እ. . .
ክቡር ሚኒስትር ገንዘቡ እንደተከፈለኝ የእርስዎን ሙሉ ኮሚሽን አስገባለሁ፡፡
በሳምሶናይት የያዝከው ምንድነው?
እስከዚያው ለሥራ ማስኬጃ እንዲሆነዎት ያመጣሁት ገንዘብ ነው፡፡
ስማ እኔ በብር ከሆነ አልቀበልህም፡፡
ታዲያ በምንድነው የሚፈልጉት?
በውጭ ምንዛሪ፡፡
ክቡር ሚኒስትር አገሪቷ ምን ያህል የውጭ ምንዛሪ ችግር ውስጥ እንዳለች መቼም ያውቃሉ፡፡
እሱ አይመለከተኝም፡፡
ታዲያ ምን ላድርግ?
ክፈታ፡፡
ምን ክቡር ሚኒስትር?
ኤልሲ!
[ክቡር ሚኒስትሩ እየተገመገሙ ናቸው]

እንዴት ዓይነት ደፋር ነዎት ግን ክቡር ሚኒስትር?
ምን አደረግኩ?
መንግሥት ባለሥልጣናት ላይ ሳይቀር ዕርምጃ እየወሰደ መሆኑን ዘነጉት እንዴ?
እሱንማ እኔም በጣም የምደግፈው አካሄድ ነው፡፡
ትንሽ አያፍሩም እንዴ?
ምን ያሳፍረኛል?
የሌባ ዓይነ ደረቅ መልሶ ልብ ያደርቅ አሉ፡፡
ማን ነው ሌባው?
እርስዎ ራስዎት፡፡
ብንከባበር ይሻላል፡፡
ማስረጃ አለን እኮ፡፡
የምን ማስረጃ ነው?
መሥሪያ ቤትዎት ያወጣውን ጨረታ ያሸነፈው ማን ነው?
እ. . .
ባለፈው ሆቴል ውስጥ ኮሚሽንዎትን በውጭ ምንዛሪ ሲቀበሉ ማስረጃ አለን፡፡
እኔ እኮ የመንግሥት ስትራቴጂን ተከትዬ ነው፡፡
የምን የመንግሥት ስትራቴጂ ነው?
ማለቴ መንግሥት የውጭ ቀጥተኛ ኢንቨስተመንትን ያበረታታል፡፡
ታዲያ የእርስዎን ሙስና ከዚህ ጋር ምን አገናኘው?
ያው እኔም ለአገሪቷ የውጭ ምንዛሪ ለማስገባት አስቤ ነው፡፡
ኪኪኪ. . .
እውነቴን ነው፡፡
ለዛ ነው ኮሚሽንዎን በውጭ ምንዛሪ የተቀበሉት?
አዎ እንደነገርኩህ ስትራቴጂዬ የውጭ ቀጥተኛ ኢንቨስትመንትን መሠረት ያደረገ ነው፡፡
ምን የሚሉት ስትራቴጂ ነው?
የውጭ ቀጥተኛ ሙስና!