Skip to main content
x
ክቡር ሚኒስትሩ ከቤት ሊወጡ ሲሉ ከልጃቸው ጋር እያወሩ ነው

ክቡር ሚኒስትሩ ከሚስታቸው ጋር በስልክ እያወሩ ነው

[ክቡር ሚኒስትሩ ከቤት ሊወጡ ሲሉ ከልጃቸው ጋር እያወሩ ነው]

  • አንተ ትምህርት ቤት አትሄድም እንዴ?
  • ሙድ የለኝም ባክህ ዳዲ፡፡
  • ምንድነው ያልከው?
  • ሙዴ ተከንቷል አልኩህ እኮ ዳዲ፡፡
  • ምንድነው የምታወራው?
  • ምነው ዳዲ?
  • ሙድ መከነት ምንድነው?
  • የአራዳ ቋንቋ አታርፍም አይደል ዳዲ?
  • ስማ አንተ ልጅ ከፀረ ልማት ኃይሎች ጋር መዋልህን አልተውክም ማለት ነው?
  • ጀመረህ ደግሞ ዳዲ?
  • ትምህርት ተጀምሯል አይደል እንዴ?
  • በቃ ደብሮኛል ዳዲ፡፡
  • ምን ሆነህ ነው የደበረህ?
  • ሁሉም ነገር ነዋ ዳዲ፡፡
  • ለትምህርትህ የሚያስፈልገው ነገር ሁሉ ተደርጎልሃል አይደል እንዴ?
  • አልተደረገልኝም ዳዲ፡፡
  • ምን ጎደለህ ደግሞ?
  • ብዙ ነገር ዳዲ፡፡
  • እስቲ አንዱን ንገረኝ?
  • በጣም የሚያሳፍር ነገር ነው የተደረገብኝ፡፡
  • እኮ ምን?
  • ክረምቱን እንዴት እንዳሳለፍኩት ረሳኸው?
  • ክረምቱ ምን ሆነ?
  • ያለፈውን ክረምት አስታውሰው እስኪ?
  • ያለፈው ክረምት ምን ሆነ?
  • ቫኬሽን የት ነበር የላከኝ?
  • አውሮፓ ነበር አይደል የሄድከው?
  • ምን ቫኬሽን ብቻ ሾፒንግ የት ነበር የላከኝ?
  • ዱባይ ነዋ፡፡
  • እሺ በዚህ ዓመት ቫኬሽን የት ነበረ?
  • ገጠር ነዋ፣ አገርህንም ማወቅ አለብህ?
  • ሾፒንግስ የት ነበር?
  • ቦሌ ነዋ ያደረከው፣ ምን ችግር አለው?
  • እኔ ይኼ መመርያ ምናምን የተባለው ነገር ከወጣ በኋላ ተቀያይረህብኛል፡፡
  • ምን ሆኜ ነው የተቀያየርኩት?
  • ባለፈው ዓመት ትምህርት ቤት በምንድን ነበር የምሄደው?
  • በምንድን ነበር የምትሄደው?
  • ሰኞ በነጭ ቪ8 ከሄድኩ፣ ማክሰኞ በጥቁሩ ነበር የምሄደው፡፡
  • እሺ፡፡
  • ረቡዕ በሲልቨር ቪ8 ከሄድኩ፣ ሐሙስ በመርሴዲስ ነበር፡፡
  • እሺ…
  • ዓርብ ደግሞ በሀመሩ ነበር፡፡
  • አሁንስ?
  • አሁንማ ከሰኞ እስከ ዓርብ በስኩል ባስ ነው የምመላለሰው፡፡
  • ለመሆኑ አንተ ተማሪ ነህ የመኪና ነጋዴ?
  • አንተው እኮ ነው ያስለመድከኝ?
  • ምን ላድርግህ ታዲያ?
  • እኔ እኮ ሳይኮሎጂካሊም ተጎዳሁ፤ እንዴት ብዬ ነው ከሌሎቹ ተማሪዎች ጋር አብሬ የምሄደው?
  • ከሌሎቹ ተማሪዎች ጋር አብረህ ብትሄድ ምን ችግር አለው?
  • እኔ የሚኒስትር ልጅ አይደለሁም እንዴ?
  • እኔ እኮ ሚኒስትር የሆንኩት ሕዝብ ለማገልገል ነው፡፡
  • ሕዝብ አገልግለህ ነው ፎቅ የሠራኸው?
  • እ…
  • ይኼን ሁሉ ቤት የሠራኸው ሕዝብ በማገልገል ነው?
  • ምን አልክ አንተ?
  • ለነገሩ አንተ ሕዝብ ማገልገል ሳይሆን የምትወደው…
  • እ…
  • በሕዝብ መገልገል ነው!

 

[ክቡር ሚኒስትሩ ከሚስታቸው ጋር በስልክ እያወሩ ነው]

  • በቃ እኔ እኮ ታገትኩ?
  • ቤት ውስጥ አሸባሪዎች ገቡ እንዴ?
  • ምንም ዓይነት እንቅስቃሴ ማድረግ እኮ አልቻልኩም?
  • የምን እንቅስቃሴ ነው?
  • ስማ በዓል በመጣ ቁጥር የምሠራውን ሥራ ረሳኸው እንዴ?
  • ሴትዮ አሁን ጊዜው ጥሩ አይደለም፡፡
  • እና እጅና እግሬን አጣምሬ ቁጭ ልበል?
  • እንደዚያማ መሆን የለበትም፡፡
  • ለምንድን ነው ግራ የምታጋባኝ?
  • ግራ መጋባትን ምን አመጣው?
  • ልንቀሳቀስ ስልህ ጊዜው ጥሩ አይደለም ትለኛለህ፤ ልቀመጥ ስልህ ደግሞ እንደዛ መሆን የለበትም ትለኛለህ፡፡
  • እንደዚያ ያልኩሽ እኮ ዓይኖች ሁሉ እኛ ላይ ስለሆኑ ነው፡፡
  • ምን ተሻለ ታዲያ?
  • መጠንቀቅ አለብን፡፡
  • ታዲያ ተጠንቅቀን መሥራት አንችልም?
  • ተጠንቅቀን መሥራት ማለት ምን ማለት ነው?
  • የማያስታውቅ ሥራ መሥራት ነዋ፡፡
  • ስሚ እንደ እኔ እንደ እኔ አንቺ ዝም ብለሽ ብትሄጂ ይሻላል፡፡
  • የት?
  • ዱባይም ምናምን ቢሆን ነዋ፡፡
  • ስማ ሰውዬ እኔ ልጆቼን ጥዬ የትም መሄድ አልፈልግም፡፡
  • እሱን እንኳ ተይው፡፡
  • እንዴት ማለት?
  • ቂሊንጦ ስትገቢ ልጆችሽን ጥለሽ አይደል እንዴ?
  • እውነቱን እናውራ ከተባለማ ከእኔ ይልቅ አንተ ነህ ለቂሊንጦ ቅርብ፡፡
  • አብዛኛው ነገር በአንቺ ስም መሆኑን ረሳሽው እንዴ?
  • ታዲያ እኔ ባለሥልጣን አይደለሁ፤ ግፋ ቢል ንብረቴን ያግዳሉ እንጂ አያስሩኝም፡፡ ባለሥልጣን ስላልሆንኩ፣ ቢዝነስ መሥራት መብቴ መስሎኝ?
  • ሙስና የግል ሴክተሩም እንደሚነካ መቼም ታውቂያለሽ፡፡
  • እኔን አይመለከተኝም አልኩህ፡፡
  • አሁን ደግሞ ዋና ትኩረትቸው በባለሥልጣናት ዙሪያ ያሉ ሰዎች ላይ ነው፡፡
  • እያስፈራራኸኝ ነው?
  • ለማንኛውም ወደ ዱባይ ብትሄጂ ጥሩ ነው፡፡
  • ስማ እኔ የመጣብኝን እቀበላለሁ፡፡
  • እስርም ቢሆን?
  • ለምን እታሰራለሁ?
  • ያልተገባ ሀብት አካብተሻል ተብለሽ ነዋ፡፡
  • በቃ እንደሌሎቹ በስሜ ያለን ሀብት ሸጣችሁ ውሰዱት ብሎ መገላገል ነዋ፡፡
  • አሁን አንቺን በዛ ይምሩሻል ብለሽ ነው፡፡
  • እኔ የኢትዮጵያን ሕዝብ ሳውቀው ምስኪንና መሃሪ ሕዝብ ነው፡፡
  • ለዚያ ነው እንደዚህ ያለ ይሉንታ የምትበይው?
  • አንተም ከመቼ ጀምሮ ነው ለሕዝቡ ተሟጋች የሆንከው?
  • ሕዝብ ከተነሳብሽ ጥሩ አይደለም ብዬ ነው፡፡
  • ምን አድርጊ እያልከኝ ነው?
  • በቃ ለጊዜው ከአገር ውጪ፡፡
  • ከዱባይ ግን ለምን ወደ ቻይና አልሄድም?
  • ለምን?
  • በዛው ዕቃ አስጭናለኋ፡፡
  • ምን ዓይነት ዕቃ?
  • በቃ ብዙ ዓይን ውስጥ የማይከት ዕቃ፡፡
  • እኮ ምንድነው?
  • ለምሳሌ ርችት፡፡
  • ርችት ምን ያደርግልሻል?
  • በቃ ሰው በየልደቱም፣ በየበዓሉም ይተኩሰዋላ፡፡
  • ጥሩ ዕቃ አይመስለኝም፡፡
  • ለምን?
  • ሰው እንደድሮው ለርችት ቦታ መስጠት አቁሟል፡፡
  • ለምን ተብሎ?
  • መንግሥት በየቦታው እንደ ርችት የሚያፈነዳው ነገር ስላለ፡፡
  • ምንድነው እሱ?
  • ትራንስፎርመር!

 

[ለክቡር ሚኒስትሩ አንድ ዳያስፖራ ወዳጃቸው ይደውልላቸዋል]

  • ሄሎ ክቡር ሚኒስትር፡፡
  • ማን ልበል?
  • ወዳጅዎት ነኝ ከአሜሪካ፡፡
  • ዛሬ ከየት ተገኘህ?
  • ሁሌም ሲናፍቁኝ እኮ እደውላለሁ፡፡
  • ለመስቀል በግ መግዣ ልከህልኝ ነው?
  • ባለሥልጣን ስጦታ መቀበል ይችላል እንዴ?
  • ምን ችግር አለው?
  • ያው እዚህ አሜሪካ ባለሥልጣናት ስጦታ መቀበል ስለማይችሉ ነው፡፡
  • አሁን በግ ስጦታ መሆኗ ነው?
  • ለነገሩ እርስዎ ፎቅ ለምደው በግ ምንም ናት፡፡
  • ስማ እርሱ ድሮ ቀረ፡፡
  • እንዴት?
  • አሁን እንኳን ፎቅ በግ የሚሰጥ የለም፡፡
  • ዛሬ እንኳን የደወልኩት የዚህች አገር ጉድ ማለቂያው መቼ ይሆን ለማለት ነው፡፡
  • እንዴት ማለት?
  • ክቡር ሚኒስትር የሰማሁትን ነገር ከእርስዎ ለማጣራት ነው የደወልኩት፡፡
  • እኮ ምን ሰምተህ ነው?
  • ሚዲያ ላይ የሚወራው እውነት ነው?
  • ስለግጭቱ ነው?
  • እሱማ እውነት መሆኑን እናንተም ተናግራችኋል፡፡
  • ታዲያ ምን ሰምተህ ነው?
  • ስለስኳር የሚወራው ወሬ፡፡
  • ምን አወሩ ደግሞ?
  • ኢትዮጵያ ወደ ጎረቤት አገር ስኳር ኤክስፖርት አድርጋ ነበር አሉ፡፡
  • ታዲያ ኤክስፖርት ማድረግ ምን ችግር አለው?
  • የራሷ አሮባት የጎረቤቷን ታማስላለች አሉ፡፡
  • ምን ለማለት ፈልገህ ነው?
  • አገሪቷ ውስጥ ስኳር የሚባል ነገር ጠፍቶ በብቸኝነት የሚገኘው ስኳር በሽታ ነው ይባላል፡፡
  • ስማ አሁንም ከእነዚያ ፀረ ልማት ኃይሎች ጋር ነው አይደል የምትውለው?
  • እኔ የምለው ክቡር ሚኒስትር፣ ኢምፖርት የተደረገውን ነው መልሳችሁ ኤክስፖርት የምታደርጉት?
  • ኢምፖርት ኤክስፖርት ሲባል አልሰማህም?
  • ኪኪኪ…
  • ምን ያስቅሃል?
  • ለነገሩ አገሪቷን በግምት እንደምትመሯት ይታወቃል፡፡
  • ምን?
  • አገሪቷ በድቅድቅ ጨለማ ውስጥ ሆና እናንተ ለጎረቤት አገሮች ኃይል ትልካላችሁ፡፡
  • ሰውዬ ከአገሪቷ የኤክስፖርት ፖሊሲ ጋር ችግር አለብህ?
  • እውነት አንዳንዴ ሳስባችሁ እንኳን አገር ቤተሰብም በቅጡ መምራት የምትችሉ አይመስለኝም፡፡
  • ለመሳደብ ነው እንዴ የደወልከው?
  • ለነገሩ የደወልኩት ስኳሩ ጠረፍ ላይ መያዙ አስገርሞኝ ነው፡፡
  • ምኑ ነው የሚያስገርመው?
  • ስኳሩን አስይዛችሁ…
  • እ…
  • የላሱትን ማስመለጣችሁ!

 

[ክቡር ሚኒስትሩ ማታ ቤታቸው ደመራ እየተበራ አማካሪያቸው መጣ]

  • እንዴት መጣህ አንተ?
  • ክቡር ሚኒስትር ደመራ እኮ ከዓመት ዓመት እርስዎ ቤት ነው የማበራው?
  • ዘንድሮ መቼ ጠራሁህ ታዲያ?
  • ልማዴን ለማድረስ ነበር፣ ግን አንድ ነገር ግር ብሎኛል፡፡
  • ምንድነው እሱ?
  • በር ላይ ብዙ መኪናም የለም፤ በዛ ላይ እንደ ድሮው ሰውም የለም፤ እርስዎ ፈቃድ ያስፈልግዎታል እንዴ?
  • የምን ፈቃድ?
  • አይ አሁን አሁን ለአልበም ምርቃት፣ ለሠልፍ ምናምን ፈቃድ ስለሚያስፈልግ፣ እርስዎ ቤት ያነሰው ስላላስፈቀዱ ነው ብዬ ነው፡፡
  • ስማ እንደ ድሮው ድግስ መደገስ እንደማልችል ታውቃለህ?
  • ለነገሩ ሰው እኮ ክቡር ሚኒስትሩ ደመራ የሚያበሩት እስር ቤት ነው እያለ ነው የሚያወራው፡፡
  • ታዲያ አንተ እዚህ ምን ልታደርግ መጣህ?
  • ልተነብይ ነዋ፡፡
  • ምንድነው የምትተነብየው?
  • ወደ ምሥራቅ ከወደቀ ቂሊንጦ፣ ወደ ምዕራብ ከሆነ ደዴሳ፣ ወደ ሰሜን ከሆነ ደግሞ ሸዋሮቢት፣ ወደ ደቡብ ከሆነ ደግሞ ዝዋይ ነው የሚገቡት የሚለውን ነዋ፡፡
  • እኔ ጠፋሁ?
  • የሚሻለው መፀለይ ነው፡፡
  • ለምኑ?
  • ቅርቡ እንዲደርስዎት!

 

[ደመራው ወደ ምሥራቅ ወደቀ]

  • በእውነት ክቡር ሚኒስትር ፀሎትዎ ተሰምቷል፡፡
  • እንዴት?
  • የወደቀው ወዴት እንደሆነ አዩት?
  • ወዴት ነው?
  • ወደ ቂሊንጦ!