Skip to main content
x
ለክቡር ሚኒስትሩ አንድ ኢንቨስተር ወዳጃቸው እንኳን አደረሰዎት ለማለት ይደውልላቸዋል

ለክቡር ሚኒስትሩ አንድ ኢንቨስተር ወዳጃቸው እንኳን አደረሰዎት ለማለት ይደውልላቸዋል

[ለክቡር ሚኒስትሩ አንድ ኢንቨስተር ወዳጃቸው እንኳን አደረሰዎት ለማለት ይደውልላቸዋል]

  • እንኳን አደረስዎት ክቡር ሚኒስትር፡፡
  • ማን ልበል?
  • አላወቁኝም እንዴ ክቡር ሚኒስትር?
  • አላወቅኩህም፣ ማን ልበል?
  • በድምፄም አለዩኝም?
  • ያው ብዙ ሰው ስለሚደውልልኝ ማንነትህን አላወቅኩትም፡፡
  • ኢንቨስተር ወዳጅዎን ረሱት?
  • ውይ ውይ አንተው ነህ እንዴ? ወዳጆቼ አዲስ ስልክ አምጥተውልኝ ስልክህን አላወጣልኝም፡፡
  • እኔማ በድምፄ ሳይለዩኝ ሲቀሩ በጣም ገርሞኝ እኮ ነው?
  • እንደነገርኩህ ረስቼህ ሳይሆን ስልክ ስለቀየርኩ ነው፡፡
  • ለመሆኑ በዓል እንዴት ነው ክቡር ሚኒስትር?
  • በዓልማ እንደ ድሮ ፈንጠዝያ ቀረ እኮ፡፡
  • ምነው ክቡር ሚኒስትር? ምን ተፈጠረ?
  • የወጣውን መመርያ መቼም ዓይተኸዋል?
  • በዓል አታክብሩ የሚል መመርያ ወጣ እንዴ?
  • እኔ እኮ በዓል ሳከብር ሠርግ ነበር የሚመስለው፡፡
  • አሁን ታዲያ ምን መሰለ?
  • ስነግርህ በጣም ተቀዛቅዟል፡፡
  • ምነው ክረምቱ ነው ያቀዛቀዘው?
  • ምን እናንተም ባለሀብቶቹ ድምፃችሁን አጥፍታችሁ አቀዝቅዛችሁታል፡፡
  • እሱን እኮ ሆን ብለን ነው ያደረግነው፡፡
  • ሆን ብለን ስትል?
  • ሥልታዊ አካሄድ ነው፡፡
  • የምን ሥልታዊ አካሄድ ነው?
  • በአሁኑ ወቅት እየተፈጸመ ያለውን ነገር እያወቁ?
  • ምንድነው እየተፈጸመ ያለው?
  • ይኸው በርካታ ባለሥልጣናት እየታሰሩ አይደል እንዴ?
  • እሱስ ልክ ነህ፡፡
  • ቤት ራሱ መምጣት ያልፈለግኩት አቴንሽን እንዳልስብ ብዬ ነው፡፡
  • ባዶ እጅህንማ ከመምጣት በዚሁ በስልክ ብትጨርሰው ይሻላል፡፡
  • ክቡር ሚኒስትር ጊዜው እኮ ስለከፋ ብዬ ነው፡፡
  • ማለት እኔም ክፉ ሆኛለሁ እያልከኝ ነው?
  • ኧረ በፍፁም፡፡
  • ታዲያ የታል  ጎልድ ሌቭሉ፣ የታል በጉና በሬው?
  • በዚህ ወቅት ዓይን ውስጥ መግባት አያስፈልግም፡፡
  • ስማ ልጆቼና ሚስቴ ቁም ስቅሌን እያሳዩኝ፡፡
  • ለምን?
  • ያስለመድከንን አምጣ ብለው ነዋ፡፡
  • ታዲያ አይገዙላቸውም ነበር?
  • ከየት አምጥቼ?
  • እ. . .
  • ስማ የሕዝቡ ችግር አሁን ነው የገባኝ፡፡
  • እንዴት?
  • አንድ ዶሮ በ400 ብር?
  • በ400 ብርማ ጫጩት ነው የሚገኘው?
  • የደላው ሙቅ ያኝካል አሉ?
  • እንዴት?
  • እኔ 400 ብር ለአንድ ዶሮ ስጠየቅ፣ ሚስቴን የዶሮ ማርቢያ ልትከፍቺ ነው ወይ ብዬ እኮ ነው የተጣላኋት?
  • ክቡር ሚኒስትር ስነግርዎት በዚያ ብር ጫጩት ነው የሚገኘው፡፡
  • አንተም ይኼን እያወቅክ ነው በስልክ ብቻ እንኳን አደረሰህ የምትለኝ?
  • እኔማ አንድ ዕቅድ ይዤ ነው የደወልኩት፡፡
  • የምን ዕቅድ?
  • ይኼ ባህል መቅረት አለበት ብዬ አላምንም፡፡
  • የቱ ባህል?
  • ስጦታ የመሰጣጣት ባህሉ፡፡
  • ታዲያ ምን ይሻላል?
  • ባይሆን ለበዓል ስጦታ ሲሰጠዎት ሊነቁ ስለሚችሉ ቀኑ ይቀየር፡፡
  • ቀኑ መቼ ሊሆን?
  • ሕዝባዊ በዓላት ሲከበሩ ስጦታ ይሰጥዎት፡፡
  • ስለዚህ አንተ ስጦታህን መቼ ልታመጣ?
  • ለብሔር ብሔረሰቦች ቀን!

[የክቡር ሚኒስትሩ ሾፌር በጠዋት መጥቶ ወደ ቢሮ ሊወስዳቸው ሲል በቁጣ ያናግሩታል]

  • ምንድነው አንተ?
  • እንኳን አደረሰህ አይቀድምም ክቡር ሚኒስትር?
  • ብትደርስ ባትደርስ እኔ ምን አገባኝ?
  • ምን ሆነዋል ክቡር ሚኒስትር?
  • የእኔ ሙሰኛ መኪና ገዛህ እንዴ?
  • የምን መኪና ነው ክቡር ሚኒስትር?
  • ይኼን የያዝከውን ቆርቋሳ መኪና ነዋ፡፡
  • ታርጋውን አያዩትም እንዴ?
  • ምን ሆነ ታርጋው?
  • የመንግሥት መኪና እኮ ነው፡፡
  • እና ሌላ ሾፌር ነው ለእኔ የሚመጣልኝ?
  • እኔ ነኝ እንጂ የምወስድዎት ክቡር ሚኒስትር፡፡
  • በዚህ መኪና?
  • ምን ችግር አለው?
  • መሠረታዊ የሆነ ችግር እንዳለ ነው የገባኝ፡፡
  • ችግሩ አልታየኝም ክቡር ሚኒስትር፡፡
  • እዚህ መኪና ውስጥ እኔ ልገባ?
  • ይቅርታ አድርጉልኝ ችግሩ ግን አልታየኝም፡፡
  • እኔ አይደለሁም ልጆቼ እንኳን በዚህ መኪና አይሄዱም፡፡
  • ተው እንጂ ክቡር ሚኒስትር?
  • ምኑን ነው የምተወው?
  • ሰሞኑን ምንድነው በሚዲያ የሰማሁት?
  • ምን ሰማህ?
  • በአዲሱ ዓመት ከተማው ውስጥ ቪ8 እንዳይነዳ ተብሏል እየተባለ አይደል እንዴ??
  • ታዲያ ምንድነው የሚነዳው?
  • በቃ እንደዚች ዓይነት አነስተኛ መኪና ነዋ፡፡
  • እኮ ለእኔ ይቺን?
  • ሚኒስትር ራሱ በቪ8 እንዳይሄድ ተብሏል አይደል እንዴ?
  • ምንድነው የምትዘባርቀው?
  • ክቡር ሚኒስትር እንደገባኝ ሚዲያ አይከታተሉም ማለት ነው፡፡
  • የትኛው ሚዲያ ላይ ነው እንደዚህ የተባለው?
  • ሁሉም ሚዲያ ላይ ነው የተነገረው፡፡
  • እኮ የትኛው ሚዲያ?
  • እኔማ ቢራ ቤት ነው የሰማሁት፡፡
  • አንተ ሰውዬ ይኼን የቢራ ቤት ወሬ ተው አላልኩህም?
  • ክቡር ሚኒስትር እኔ መታሰር አልፈልግም፡፡
  • ምን አድርገህ ነው የምትታሰረው?
  • መመርያ ጥሰሃል ተብዬ፡፡
  • ለአንተ መመርያ ተላልፎልሃል?
  • ቪ8 ከተማ ውስጥ አይነዳም ተብሏል፡፡
  • ዛሬ ፊልድ ብንወጣስ?
  • እኔ አበል ስላልተቀበልኩ ከተማ ውስጥ በዚህ ነው የምንቀሳቀሰው አልኩዎት እንግዲህ?
  • አንተ አልታዘዝም እያልከኝ ነው?
  • እርስዎም ለመመርያው አልታዘዝም እያሉ እኮ ነው?
  • ስማ እዚህ መኪና ውስጥ መታየት ስለማልፈልግ በፍጥነት ወደ ቢሮ እንሂድና መኪና እንቀይር፡፡
  • ምን ችግር አለው?
  • ክብሬ ይነካል፡፡
  • እንኳን ለእርስዎ ያኔ ንጉሡ ከምታምረው አውቶሞቢላቸው ወርደው በቮልስ ሄደዋል አይደል እንዴ?
  • ያለነው እኮ በደርግ ዘመን አይደለም፡፡
  • እሱን እንኳን ተውት፡፡
  • አንተ እንድዋረድ ፈልገሃል ማለት ነው?
  • እኔ መመርያ ማክበር ነው የምፈልገው፡፡
  • ለማንኛውም በጣም ተናንቀናል፣ እሱ ነው የገባኝ፡፡
  • እንደተረዳሁት የከፍታ ዘመኑ ለእርስዎ አልተመቸዎትም፡፡
  • ያልተጠየቅከውን አትቀባጥር፡፡
  • ለነገሩ የእኔ ሥጋት የከፍታ ዘመኑ እንዳይቀየር ነው፡፡
  • በምን?
  • በክፋት ዘመን!

[ክቡር ሚኒስትሩ ከአንድ ሀቀኛ ሚኒስትር ጋር ተገናኝተው እያወሩ ነው]

  • በዓል እንዴት አለፈ ክቡር ሚኒስትር?
  • የዘንድሮ በዓልማ ቀዝቀዝ ያለ ነው፡፡
  • ለምን ቀዘቀዘ?
  • ያው ግርግሩም ያን ያህል የለም፡፡
  • እኔ ግን ደስ ያለኝ በዓል ይኼ ነው፡፡
  • እንዴት?
  • በቃ ያለፈው ዓመት ብዙ ቀውሶች የነበሩበት ነው፡፡
  • ይኼኛውስ እንደሌለበት በምን አወቅክ?
  • ያው መንግሥትም የከፍታ ዘመን ብሎ ስላወጀ ተስፋ ሰጪ ዓመት ይመስለኛል፡፡
  • መቼስ አንተ ካልክ ይሁን፡፡
  • መቼስ ሲሉ ምነው?
  • አይ እኔ አንዳንድ ያልተዋጡልኝ ነገሮች አሉ፡፡
  • ምኑ ነው ያልተዋጠልዎት?
  • አየህ አገር የሚረጋጋው አመራሩ ከላይ ሲረጋጋ ነው፡፡
  • አመራሩ ሲረጋጋ ሲሉ?
  • እኛ ሳንጨነቅ፣ ረጋ ብለን ሥራችንን ስንሠራ ነው አገር የሚረጋጋው፡፡
  • አሁን ሥራ ቆሟል እንዴ?
  • ሥራማ በሚገባ ቆሟል፡፡
  • አልገባኝም ክቡር ሚኒስትር?
  • አሁን እኔ ምንም ዓይነት ነገር ፈርም ብትለኝ መፈረም አቁሜያለሁ፡፡
  • ለምን?
  • ነገ ምን እንደሚመጣ አውቃለሁ?
  • ክቡር ሚኒስትር አንድ ተረት እያስታወሱኝ ነው፡፡
  • የምን ተረት?
  • ይኼ ምን ያለበት ምን አይችልም የሚለውን ነዋ?
  • እኔ እንደዚያ እያልኩኝ አይደለም፡፡
  • ታዲያ ምን እያሉ ነው?
  • እኔ ዛሬ በቅንነት ሥራ ማስኬጃ ስፈርም ነገ ምን እንደሚመጣብኝ አላውቅም፡፡
  • እርስዎ የሚፈርሙበትን ነገር አያውቁትም እንዴ?
  • ስነግርህ መጨረሻዬ ቂሊንጦና ማዕከላዊ እንዲሆን አልፈልግም፡፡
  • ያልገባኝ ሳያነቡ ነው እንዴ የሚፈርሙት?
  • አየህ አንዳንድ ፀረ ልማት ኃይሎች ሊያጠቁን ይችላሉ፡፡
  • ሊያጠቁን ሲሉ?
  • በቃ እኛ በቅንነት የፈረምነውን ነገር በኋላ ጠምዝዘው ተጠያቂዎች ሊያደርጉን ይችላሉ፡፡
  • አንብበው አይደል እንዴ የሚፈርሙት?
  • ስንቱን አንብበኸው ትችለዋለህ?
  • ሳያነቡ መፈረምማ የኋላ ቀርነት መገለጫ ነው፡፡
  • አይ እያንዳንዱን ነገር ላንብበው ብል ሥራ አይሠራም ብዬ ነው፡፡
  • እና ምን እያሉ ነው ክቡር ሚኒስትር?
  • ያው መንግሥት ነገሮችን እንደዚህ መቆጣጠር የለበትም፡፡
  • ምን ይደረግ እያሉ ታዲያ?
  • በቃ መንግሥት ነገሮችን ያፍታታ፡፡
  • ሲፍታታማ ይኸው ከአንድ መሥሪያ ቤት አምስት ሰዎች እየታሰሩ ነው፡፡
  • ባለሥልጣን ቢሞስን እኮ ዞር ብሎ አገር ነው የሚያለማው፡፡
  • መንግሥት ግን አንድ ስህተት የሠራ መሰለኝ፡፡
  • የምን ስህተት?
  • የሚሠሩ ወጣቶችን አንድ ለአምስት ሲያደራጅ አብሮ ሌሎችንም አደራጅቷል፡፡
  • ሌሎች ምኖችን?
  • ሌቦችን!

[ለክቡር ሚኒስትሩ አንድ ደላላ ይደውልላቸዋል]

  • አንተ የት ጠፍተህ ነው?
  • ወጣ ብዬ ነበር ክቡር ሚኒስትር፡፡
  • እኮ የት?
  • ወደ ዱባይ፡፡
  • አይ የደላው፣ እኛ እንደዚህ ተሳክቶልን ወጣ ብንል ደስ ይለኝ ነበር፡፡
  • ታዲያ ምን ችግር አለው ወጣ ብለው ይምጡ?
  • በዚህ ጊዜ ከአገር መውጣት እንደማንችል አታውቅም?
  • ለምን ተብሎ?
  • ይኸው እያንዳንዱ የውጭ ጉዞ በጠቅላይ ሚኒስትሩ ቢሮ አልፎ ነው የሚፈቀደው፡፡
  • ይኼን አልሰማሁም ነበር፡፡
  • አዲስ መመርያ ተላልፏል፡፡
  • ለማንኛውም እንኳን አደረስዎት፡፡
  • ለምኑ?
  • ለአዲስ ዓመት ነዋ፡፡
  • ምን አዲስ ዓመት አለ ብለህ ነው?
  • እንዴት?
  • ይኸው ሰው ሁሉ ፈርቶ ስጦታ ያመጣ እንኳን የለም፡፡
  • ክቡር ሚኒስትር የሕዝብ ጥያቄ ስላለ መንግሥት ይኼን ሙቀት ማቀዝቀዝ ፈልጎ እኮ ነው፡፡
  • ታዲያ እኛ ፍሪጆች ነን እንዴ? በዓል እኮ ባዷችንን ነው የዋልነው፡፡
  • ስነግርዎት ይኼ ነገር ማለፉ አይቀርም፡፡
  • ስማ አሁን እኮ ፖሊስ መጥቶ በማንኛውም ሰዓት ሊወስደኝ ይችላል፡፡
  • ኧረ ይረጋጉ ክቡር ሚኒስትር፡፡
  • ብረጋጋ ምን ይጠቅመኛል?
  • አሁን ስትራቴጂ ነድፈን መንቀሳቀስ አለብን፡፡
  • የምን ስትራቴጂ ነው?
  • በቃ የጦፈ ጦርነት ማወጅ አለብን፡፡
  • ማን ላይ?
  • ጦርነት ማወጅ ብቻ ሳይሆን ማጥቃትም አለብን፡፡
  • እነ ማንን?
  • ፀረ ሙሰኞችን!