Skip to main content
x
ክቡር ሚኒስትሩ ቢሮ ሲገቡ አማካሪያቸውን አስጠሩት

ክቡር ሚኒስትሩ ቢሮ ሲገቡ አማካሪያቸውን አስጠሩት

[ለክቡር ሚኒስትር በጠዋቱ አንድ ወዳጃቸው ደወለላቸው]

  • ሰላም ክቡር ሚኒስትር፡፡
  • እንዴት ነህ ወዳጄ?
  • እንኳን ደስ አለዎት፡፡
  • ደግሞ ለምኑ ነው?
  • ሥራ ጀመረ አይደል እንዴ?
  • ኧረ ገና የፊንሺንግ ሥራ እየሠራሁ ነው፡፡
  • የምኑን ክቡር ሚኒስትር?
  • ስለ ሕንፃዬ አይደል እንዴ የምታወራው?
  • እኔ እንኳን ስለሕንፃዎት አልነበረም ያወራሁት፡፡
  • ታዲያ ስለምንድን ነው የምታወራው?
  • ፓርላማውን ማለቴ ነው፡፡
  • እ… ተከፈተ አይደል?
  • ክቡር ሚኒስትር ሙሉ ለሙሉ ዞሩ እንዴ?
  • ወዴት ነው የምዞረው?
  • ማለቴ የፓርላማውን ሥራ ትተው ወደ ንግዱ ዓለም ሙሉ ለሙሉ ገቡበት ወይ?
  • የፖለቲካ ሥራዬንማ ሙሉ ለሙሉ አልተውኩትም፡፡
  • እንደው ችላ ያሉት ስለመሰለኝ ነው?
  • ፖለቲካውንማ እንዴት እተወዋለሁ? ለንግዱ መሠረት የሆነኝ ሥራ እኮ ነው?
  • ታዲያ የፓርላማውን መከፈት አስመልክቼ እንኳን ደስ አለዎት ስልዎት ምንም አላስታወሱትም ብዬ ነው?
  • የደወልከው እንኳን ደስ አለህ ለማለት ነው?
  • የደወልኩት እንኳን በጣም ስለናፈቁኝ ነው፡፡
  • አልገባኝም?
  • እርስዎ እኮ አባቴ ማለት ነዎት፡፡
  • ምን?
  • ያው ልጅ አባቱ ጋ ቢደውል ምን አለበት?
  • ምነው እንደዚህ ቀባባኸኝ?
  • ኧረ እየቀባባሁዎት አይደለም፣ ከልቤ ነው፡፡
  • አሁንም አስፈለገህ እንዴ?
  • ምን ክቡር ሚኒስትር?
  • ሌላ ብድር ነዋ፡፡
  • ኧረ በፍጹም ክቡር ሚኒስትር፡፡
  • ታዲያ ምን ፈልገህ ነው?
  • ክቡር ሚኒስትር ወዳጆች መሆናችንን ረሱት እንዴ?
  • ወዳጅ መሆናችንንማ አውቃለሁ፣ ለዛ ከሆነ የደወልከው ደህና፡፡
  • ግን እርስዎ ደስተኛ ነዎት?
  • በምኑ?
  • ማለቴ በሥራዎትም ብቻ በሁሉም ነገር፡፡
  • ምንም እየገባኸኝ አይደለም፡፡
  • ክቡር ሚኒስትር የእርስዎ ጤንነት እኮ ያሳስበኛል፡፡
  • ከመቼ ጀምሮ?
  • ምን ነካዎት ክቡር ሚኒስትር ከእርስዎ በላይ ለእኔ ማን አለ?
  • ዛሬ በእርግጥ የፈለካት ነገር አለች ማለት ነው?
  • ኧረ በእውነት ሰላም ለማለት ነው የደወልኩት፡፡
  • ብቻ እንዳታስቀኝ?
  • ምን ብዬ ክቡር ሚኒስትር?
  • ይሰረዝልኝ ብለህ ነዋ፡፡
  • ምኑ ክቡር ሚኒስትር?
  • ብድሩ፡፡
  • ክቡር ሚኒስትር እርስዎ እኮ በክፉ ቀኔ የደረሱልኝ ወዳጄ ነዎት፡፡
  • እሱስ ትክክል ነህ፡፡
  • እንደዚህ ዓይነት ነገር ላደርግም አልችልም፣ ላስብም አልችልም፡፡
  • እንግዲያው ፓርላማው ሥራ ጀመረ ብለህ ከደወልክልኝ ደግሞ ሥራ ፈተሃል ማለት ነው?
  • ክቡር ሚኒስትር የደወልኩት እንኳን አዘጋጅቼያለሁ ለማለት ነው፡፡
  • ምኑን ነው ያዘጋጀኸው?
  • ያው ከቅድም ጀምሮ ሲሉኝ አልነበረ?
  • ብድሩን?
  • አዎ ክቡር ሚኒስትር፡፡
  • ምን ያህሉን ነው ያዘጋጀኸው?
  • ሙሉውን ነው ያዘጋጀሁት ክቡር ሚኒስትር፡፡
  • ሁሉም እንዳንተ ቢሆን ደስ ይለኝ ነበር፡፡
  • ክቡር ሚኒስትር እኔ እኮ ገና ለሕንፃዬ ያበድሩኛል ብዬ ስለማስብ በቃሌ ነው የምገኘው፡፡
  • በዚህ እንኳን አትታማም፡፡
  • እውነት ነው ክቡር ሚኒስትር፡፡
  • ያው የብር ተመን ላይ ማሻሻያ መደረጉን ሰምተሃል፡፡
  • እሱን ሰምቻለሁ፣ ከእኔ ብድር ጋር ምን አገናኘው ክቡር ሚኒስትር?
  • መቼም በድሮ ተመን ልትከፍለኝ አልመጣህም?
  • አልገባኝም ክቡር ሚኒስትር?
  • መንግሥት ያወጣውን መመርያ ማክበር አለብህ፡፡
  • ምን እያሉ ነው ክቡር ሚኒስትር?
  • ብድሩን የምቀበልህ…
  • እ…
  • በአዲሱ ተመን ነው!

 

[ክቡር ሚኒስትሩ ከቤት ሊወጡ ሲሉ ልጃቸውን አገኙት]

  • አንተ ትምህርት ቤት አትሄድም እንዴ?
  • ዛሬ አልሄድም ዳዲ፡፡
  • ለምን? የለም እንዴ?
  • አለ ግን ሰስፔንድ ተደርጌ ነው፡፡
  • ምን?
  • ሰስፔንድ ተደርጌያለሁ፡፡
  • ምንድነው የምትለው አንተ ልጅ?
  • አስተማሪዬ ትናንትና ግቢ ውስጥ ረብሸሃል ብሎ ሰስፔንድ አደረገኝ፡፡
  • እና ምንድን ነው የሚደረገው?
  • ዛሬ ቤት ነው የምውለው ዳዲ፡፡
  • ተበላሽተህልኛላ?
  • ኧረ ምንም አልተበላሸሁም ዳዲ፡፡
  • እኔ እንደውም ስለአንተ ብዙ ነገር ነው የምሰማው፡፡
  • ምን ሰማህ ዳዲ?
  • ተቆጣጣሪ የሌለው ዱርዬ ልጅ መሆንህን ሰምቻለሁ፡፡
  • ኧረ ውሸት ነው ዳዲ፡፡
  • ትምህርት ቤት አትገባም፣ መጠጥ ትጠጣለህ አሉ፣ ሲጋራም ጀምረሃል ሲሉ ሰምቻለሁ፡፡
  • አሁን ይኼ ወሬ ተብሎ ለአንተ ተነግሮህ ነው?
  • በጣም ጋጠወጥ ሆነሃል ማለት  ነው፡፡
  • ኧረ ዳዲ ፋራ አትሁን?
  • ምን አልከኝ አንተ?
  • ዳዲ እሱን ተወውና አንድ ጥያቄ አለኝ፡፡
  • የምን ጥያቄ?
  • መኪና ግዛልኝ፡፡
  • ገና ከመሬት ሳትነሳ መኪና ግዛልኝ?
  • ዳዲ በጣም ስለሚያስፈልገኝ መኪና ግዛልኝ?
  • ለምንድን ነው የሚያስፈልግህ?
  • ምክንያቴን የምናገረው አንድ ነገር ሲሆን ነው፡፡
  • ምን ሲሆን?
  • ጥያቄዬ ተቀባይነት ሲያገኝ!

 

[ክቡር ሚኒስትሩ ከሾፌራቸው ጋር ወደ ቢሮ እየሄዱ ነው]

  • ምነው ዛሬ በጠዋት ፊትህ ጠቋቁሯል?
  • ደብሮኝ ነው ክቡር ሚኒስትር፡፡
  • ምን ሆነህ ነው የደበረህ?
  • አየሩን ራሱ አይመለከቱትም? ፀሐይ ወጣ ስንል ዝናብ እየሆነ ያስደብረናል፡፡
  • አንተ በሜትሮሎጂ ነው እንዴ ፊትህ የሚበራውና የሚጨልመው?
  • ምን ክቡር ሚኒስትር ኑሮ ራሱ ከፍ ዝቅ እያለ ያሰቃየናል፡፡
  • ይኼኔ ማታ አረቄህን ልፈህ ነው ጠዋት ደበረኝ የምትለው፡፡
  • ክቡር ሚኒስትር ወድጄ እኮ አይደለም አረቄ የምጠጣው?
  • ታዲያ ምን ሆነህ ነው?
  • የኑሮ ውድነቱን ለመርሳት፡፡
  • አረቄ ያስረሳል ብለህ ነው?
  • ቢሳካልኝማ ውስኪ ነበር የምጠጣው?
  • ስማ አረቄ በመጠጣትህ ደስ ነው ሊልህ የሚገባህ፡፡
  • ለምን ክቡር ሚኒስትር?
  • የአገር ውስጥ ምርትን እያበረታታህ ነዋ፡፡
  • ኧረ አይቀልዱብኝ ክቡር ሚኒስትር፡፡
  • ለማንኛውም የመንግሥት ፖሊሲ ትደግፋለህ ማለት ነው?
  • ክቡር ሚኒስትር አንድ ጥያቄ  ግን ነበረኝ፡፡
  • የምን ጥያቄ?
  • ደመወዝ ይጨመርልኝ፡፡
  • ለምን?
  • ምክንያቴን የምናገረው በአንድ ነገር ነው፡፡
  • በምን?
  • ጥያቄዬ ተቀባይነት ሲያገኝ!

 

[ክቡር ሚኒስትሩ ቢሮ ሲገቡ ጸሐፊያቸው ተከትላቸው ገባች]

  • ደህና አደሩ ክቡር ሚኒስትር?
  • እንዴት አደርሽ?
  • ዛሬ ለአንድ ጉዳይ ነው የመጣሁት፡፡
  • እንግዳ አለኝ እንዴ?
  • እንግዳ እንኳን የለዎትም፡፡
  • እሺ ምን ፈለግሽ?
  • ይቺን ወረቀት ይመልከቷት፡፡
  • የምን ወረቀት?
  • እንኩ ይመልከቷት፡፡
  • የሥራ መልቀቂያ ደብዳቤ?
  • አዎን ክቡር ሚኒስትር፡፡
  • ምነው የተሻለ ሥራ አግኝተሽ ነው?
  • አይ ክቡር ሚኒስትር የተሻለ ሥራ ከየት ይመጣል?
  • ማለት?
  • ያው በትምህርቴም ብዙ ስላልገፋሁ፣ የተሻለ ሥራ ከየት አመጣለሁ ብለው ነው?
  • ታዲያ ሥራውን ጠልተሽው ነው?
  • ክቡር ሚኒስትር እኔ የምፈልገው መልቀቅ ነው፡፡
  • ባለፈው ለሠራሽው ሥራ የተከፈለሽ ኮሚሽን አንሶሽ ነው?
  • ክቡር ሚኒስትር እኔ ይኼን ደብዳቤ ተቀብለውኝ ከሥራ ያሰናብቱኝ፡፡
  • ለምንድን ነው የማሰናብትሽ?
  • በቃ ከዚህ በኋላ ሥራውን መሥራት አልፈልግም፡፡
  • እኮ ምክንያትሽ ምንድን ነው?
  • እሱን የምናገረው አንድ ነገር ሲሟላ ነው፡፡
  • ምን ሲሟላ?
  • ጥያቄዬ ተቀባይነት ሲያገኝ!

 

[ክቡር ሚኒስትሩ ለምሳ ቤት ሲሄዱ ሚስታቸውን አገኟቸው]

  • አንተ ምንድነው የሚወራው?
  • ምን ሲወራ ደግሞ ሰማሽ?
  • ያልደወለልኝ ሰው እኮ የለም፡፡
  • እኮ ለምን?
  • ሊለቅ ነው ወይ እያሉኝ ነዋ፡፡
  • ምንድነው የምለቀው?
  • ሥራህን ነዋ፡፡
  • በቃ ቡና ላይ የሚወራውን ጐሲፕ እዚህ እንደ ቁምነገር ከእኔ ጋር ታወሪያለሽ አይደል?
  • የቡና ጐሲፕ አይደለም፣ ብዙ ሰው ነው የደወለልኝ፡፡
  • ፌስቡክ ላይ ተጥደሽ መዋል ጀመርሽ እንዴ?
  • ተደውሎልኝ ነው አልኩህ እኮ?
  • ለነገሩ ሥራ ስለሌለሽ ፌስቡክ ላይ ብትውይም አይገርመኝም፡፡
  • ምን ላድርግ ሥራ እንደሆነ ከቀዘቀዘ ቆየ?
  • አገሪቷ ላይም ሁሉ ነገር ተቀዛቅዟል፡፡
  • በነገራችን ላይ ፌስቡክ ላይ የመመለሱን ዜና ሰምቼ ነበር፡፡
  • ማን ነው የተመለሰው?
  • ኤክስፖርት የተደረገው ስኳር፡፡
  • አዎ ተመልሷል፡፡
  • ታዲያ እናንተ መሸጥ ካልቻላችሁ ለእኔ ለምን አትሰጡኝም?
  • ምን ሆነሻል ሴትዮ?
  • ስማ እዚህ እኮ ኪሎ 50 ብር ደርሷል፡፡
  • ስኳሩ የመንግሥት ዓይኑ ውስጥ ስለገባ እንደዛ ማድረግ ከባድ ነው፡፡
  • አገር ውስጥ ብሸጠው ጥሩ ገንዘብ አገኝበታለሁ ብዬ ነው፡፡
  • ይልቁኑ አንድ ሥራ እሰጥሻለሁ፡፡
  • የምን ሥራ?
  • ኮፍያና ቲሸርት እንድታትሚ አስደርጋለሁ፡፡
  • ለምኑ?
  • ለአቀባበል ፕሮግራሙ!

 

[ክቡር ሚኒስትሩ ቢሮ ሲገቡ አማካሪያቸውን አስጠሩት]

  • አቤት ክቡር ሚኒስትር፡፡
  • በአፋጣኝ ኮሚቴ ይቋቋም፡፡
  • የምን ኮሚቴ?
  • አንድ እንግዳ ወደ አገራችን እየመጣ ነው፡፡
  • የምን እንግዳ?
  • እሱን ተወውና አሁን መሥራት ያለብህን እነግርሃለሁ፡፡
  • እሺ ክቡር ሚኒስትር፡፡
  • መጀመርያ ለአቀባበሉ ቲሸርትና ኮፍያ መታተም አለበት፡፡
  • እሺ፡፡
  • ለአቀባበሉ ፕሮግራም የሚጠሩ ሰዎች መመረጥ አለባቸው፡፡
  • እሺ ክቡር ሚኒስትር፡፡
  • ስለዚህ ከፍተኛ የመንግሥት ባለሥልጣናት በአቀባበሉ ላይ መገኘት አለባቸው፡፡
  • ማን ነው የሚጠራው?
  • ሁሉም የመንግሥት ባለሥልጣናት፣ አርቲስቶችና ታዋቂ ግለሰቦች መገኘት አለባቸው፡፡
  • ሌላስ?
  • ከሕዝብ ክንፍ፣ ከወጣቶች ፎረም፣ ከደጋፊ ነጋዴዎች ብቻ በአጠቃላይ ከተለያዩ አደረጃጀቶች እንግዶች ይጠራሉ፡፡
  • ግን ይኼን ሁሉ ሰው የት ነው የምናስተናግደው?
  • ስነግርህ ፕሮግራሙ ቀላል አይደለም፡፡
  • መልካም ክቡር ሚኒስትር፡፡
  • ለእያንዳንዱ ተሳታፊ ኮፍያና ቲሸርት መዘጋጀት አለበት፡፡
  • መቼ ጨረታ ልናወጣ?
  • ጊዜ ስለሌለ እሱን ለእኔ ተወው፡፡
  • አያስጠይቀንም ክቡር ሚኒስትር?
  • ትልቅ እንግዳ እኮ ነው የሚመጣው?
  • ለመሆኑ በቲሸርትና በኮፍያው ላይ ምንድነው የሚጻፈው?
  • እንኳን ለአገርህ አበቃህ፡፡
  • እንግዳው ኢትዮጵያዊ ነው እንዴ?
  • እህሳ?
  • ይኼን ያህል ክብር የተሰጠው እንግዳ ማን ነው?
  • ስኳሩ!