Skip to main content
x

የአዳማ መናኸሪያ በዘጠኝ ሚሊዮን ብር የማስፋፊያ ግንባታ ሊደረግለት ነው

  • ግንባታው ከሁለት ወር በኋላ ይጀመራል

ከተቋቋመ ከ30 ዓመታት በላይ ያስቆጠረው የአዳማ መናኸሪያ በዘጠኝ ሚሊዮን ብር የማስፋፊያ ግንባታ ሊደረግለት ነው፡፡ አዲስ መናኸሪያም ተዘጋጅቶ አገልግሎት በመስጠት ላይ ነው፡፡

የአዳማ ትራንስፖርት ቢሮ ምክትል ኃላፊ አቶ ቃሲም ኡስማን እንደገለጹት፣ መናኸሪያውን ለማስፋፋት ያስፈለገበት ምክንያት በየጊዜው ቁጥራቸው እየጨመሩ የመጡትን ተሽከርካሪዎችና ተጓዦች ማስተናገድ ከአቅሙ በላይ ሆኖ በመገኘቱ ነው፡፡

በአሁኑ ወቅት የቀድሞው መናኸሪያ ስፋት 18 ሺሕ 700 ካሬ ሜትር ሲሆን፣ በቀን ሁለት ሺሕ ተሽከርካሪዎችን በማስተናገድ ላይ ይገኛል፡፡ የማስፋፊያው ግንባታ ሲጠናቀቅ የቅጥር ግቢው ስፋት ወደ 22 ሺሕ ካሬ ሜትር ያድጋል፡፡ ተሽከርካሪ የማስተናገድ አቅሙም በቀን ከአራት ሺሕ በላይ ይሆናል፡፡

አዲሱ መናኸሪያ የተዘጋጀው ወደ አሰላ በሚያቀናው መንገድ በሚገኘውና 02 ቀበሌ ወይም ኒግራ (ረቡዕ ገበያ) እየተባለ በሚጠራው አካባቢ ሲሆን፣ የመናኸሪያውም ስፋት 11 ሺሕ ካሬ ሜትር መሆኑን አቶ ቃሲም ገልጸዋል፡፡

በኅብረተሰቡ ተሳትፎ የተዘጋጀው ይህ መናኸሪያ በቀን አንድ ሺሕ ተሽከርካሪዎችን የማስተናገድ አቅም እንዳለውና መፀዳጃ ቤቶች፣ የቲኬት መሸጫና የማኅበራት ቢሮዎች ያሉት መሆኑን አቶ ቃሲም አመልክተው፣ እነዚህን መገልገያዎች ለማሠራት፣ የግቢውን ዙሪያ በግንብ አጥር ለመከለልና የኤሌክትሪክ አገልግሎት ለማስገባት በጠቅላላው 222 ሺሕ ብር ወጪ መደረጉን አስረድተዋል፡፡

የማስፋፊያ ግንባታ የሚካሄድበት መናኸሪያ ሞጆ፣ ቢሾፍቱ፣ አዲስ አበባ፣ ዝዋይ ሻሸመኔ እንዲሁም 02 ቀበሌ ውስጥ የተዘጋጀው ሌላው መናኸሪያ ሐረሪ፣ ሐዋሳ፣ ድሬዳዋ፣ አሰላ፣ ኢተያ ወዘተ ለሚመላለሱ ተሽከርካሪዎች መነሻና መድረሻ ሆነው በማገልገል ላይ መሆናቸውን አቶ ቃሲም ተናግረዋል፡፡