Skip to main content
x
ክቡር ሚኒስትሩ ከግምገማው እንደወጡ ለደላላ ወዳጃቸው ደወሉ

ክቡር ሚኒስትሩ ከግምገማው እንደወጡ ለደላላ ወዳጃቸው ደወሉ

[ክቡር ሚኒስትሩ ከሾፌራቸው ጋር ወደ ሥራ እየሄዱ ነው]

  • ምን ገጠመህ ዛሬ?
  • ምነው ክቡር ሚኒስትር?
  • መኪናው ፀጥ ብሏል፤ ሬዲዮ መስማት ተውክ እንዴ?
  • ከሬዲዮ ጋርማ ተሰነባበትን፡፡
  • ምን ተፈጠረ ደግሞ?
  • ከሬዲዮ ጋር ብቻ ሳይሆን ከቴሌቪዥኑም ጋ ተቆራረጥን፡፡
  • እኮ ምን ሆንክ?
  • ክቡር ሚኒስትር በኢትዮጵያ ሚዲያዎች አፈርኩኝ፡፡
  • ምን አልከኝ?
  • በሚዲያዎቹ በጣም ነው ያዘንኩት፡፡
  • ዛሬ ገና ነው የገባህ?
  • ምኑ ክቡር ሚኒስትር?
  • እስቲ ንገረኝ ሚዲያ መቼ ነው ለአገሪቷ ዕድገት አስተዋጽኦ አድርጎ የሚያውቀው?
  • የምን ዕድገት ነው የሚያወሩት?
  • ስማ የዓረብ ስፕሪንግ ያቀጣጠሉት ሚዲያዎች መሆኑን ረሳኸው?
  • ምንድን ነው የሚያወሩት ክቡር ሚኒስትር?
  • ሚዲያ የጥፋት ኃይል እንጂ ልማት አያመጣም፡፡
  • እዚህ ላይማ አይሳሳቱ ክቡር ሚኒስትር፡፡
  • እንዴት ማለት?
  • ሚዲያማ ለአንድ አገር ዕድገት ወሳኝ ሚና ይጫወታል፡፡
  • አሁን ሚዲያ መስማት ትቻለሁ እያልከኝ ነው አይደል እንዴ?
  • እኔ መስማት ያቆምኩት ሥርዓቱ የፈጠራቸውን የሚዲያ ተቋማት ነው፡፡
  • ግራ እያጋባኸኝ ነው ሰውዬ፡፡
  • ክቡር ሚኒስትር አንድ ጥያቄ ልጠይቅዎት፡፡
  • የምን ጥያቄ ነው?
  • እስቲ እሑድ ዕለት ምን ነበር?
  • የእንግሊዝ ፕሪምየር ሊግ ነዋ፡፡
  • አገሪቷ ውስጥ ነው ያልኩዎት?
  • የእግር ኳስ ጨዋታ ነበር እንዴ?
  • ክቡር ሚኒስትር ሁላችንንም አስጨንቆን ያለፈ ጉዳይ ነበር እኮ?
  • አትሌቶቻችን ውድድር ነበራቸው እንዴ?
  • ምን ነካዎት ክቡር ሚኒስትር? ኢሬቻ አልነበር እንዴ?
  • ስማ ልማታዊ መንግሥታችን ካደረገው ጥንቃቄ የተነሳ በጣም በሰላማዊ ሁኔታ ነው እኮ ያለፈው፡፡
  • ለነገሩ ልማታዊ ሚዲያዎቹም በሰላም ተጠናቀቀ ብለው ነው ያለፉት፡፡
  • እውነታቸውን ነዋ ታዲያ፡፡
  • ክቡር ሚኒስትር እኔማ የግል ሚዲያዎችን ስከታተል ነበር፡፡
  • ምን አሉ ታዲያ?
  • ምንም እንኳን በዓሉ በሰላም ቢጠናቀቅም፣ ታዳሚዎቹ መንግሥትን በከፍተኛ ሁኔታ ተቃውመው ነበር፡፡
  • ሚዲያዎቹ ለምን አፍራሽ አልሆኑም እያልከኝ ነው?
  • እውነቱን ለምን አይዘግቡም ነው ያልኩት፡፡
  • የምን እውነት ነው?
  • አሁን ከኢሬቻ በላይ የሚያሳስብ ነገር ነበር?
  • ምን እያልከኝ ነው?
  • ማለቴ ኢሬቻ እየተከበረ የካታሎንያውያን መገንጠልና በወደፊቱ የባርሴሎና ክለብ ላይ የሚያመጣውን ዕጣ ፈንታ መዘገብ ነበረበት?
  • የአንተ ችግር እኮ ይኼ ነው፡፡
  • እንዴት ክቡር ሚኒስትር?
  • ስለግሎባላይዜሽን ምንም አታውቅም ማለት ነው?
  • የምን ግሎባላይዜሽን ነው?
  • ዓለም አንድ መንደር በሆነችበት ጊዜ ስለካታሎናውያን መገንጠል መወራቱ ምን ችግር አለው?
  • የራሷ አሮባት የሰው ታማስላለች አሉ?
  • ምን አልክ አንተ?
  • ክቡር ሚኒስትር አገሪቷ በብሔር ፖለቲካ እየታመሰች ስለዓለም አንድ መንደርነት ሲያወሩ ትንሽ አያፍሩም?
  • እስቲ ያልተጠየቅከውን አታውራ፡፡
  • ለነገሩ መንግሥትንም በጣም አድንቄዋለሁ፡፡
  • ለምን?
  • ያ ሁሉ የተቃውሞ ናዳ ሲወርድበት ዝም ማለቱ ነዋ፡፡
  • ይኼ ምን ያስደንቃል?
  • እኔማ ሕዝቡ ላይ የዱላ ናዳ ይወርድበታል ብዬ ነበር፡፡
  • እ…
  • ክቡር ሚኒስትር ከዚህ በኋላም ትፈቅዳላችሁ ማለት ነው?
  • ምን?
  • ሰላማዊ ሠልፍ!

 

[የክቡር ሚኒስትሩ ሚስት ስልክ ይደውሉላቸዋል]

  • ለምንድን ነው ስልኬን የማታነሳው?
  • ምን ሆነሽ ነው ደጋግመሽ ስልክ የምትደውይልኝ? ሥራ አላሠራ አልሽኝ እኮ?
  • ችግር ተፈጥሮ ነው፡፡
  • ልጆቹ ሰላም አይደሉም እንዴ?
  • ሰላም ናቸው፡፡
  • ቤትስ ሰላም አይደለም?
  • ኧረ ሰላም ነው፡፡
  • ታዲያ ምን ተፈጥሮ ነው እንዲህ ደጋግመሽ የደወልሽው?
  • አፋጣኝ ጉዳይ ገጥሞኝ ነዋ፡፡
  • የምን አፋጣኝ ጉዳይ?
  • ተያዘ እኮ ነው የምልህ?
  • ምን ትቀልጃለሽ?
  • አሁን ስለነገሩኝ ነው ደጋግሜ የደወልኩልህ፡፡
  • መቼ ተያዘ?
  • ዛሬ ጠዋት፡፡
  • ሜሴጅ አትልኪልኝም ነበር እንዴ?
  • ስማ መያዙን ስሰማ በጣም ስለደነገጥኩ፣ ሜሴጅ ምናምን አልመጣልኝም ነበር፡፡
  • አሁን ምንድን ነው የሚውጠን?
  • ቶሎ ብለህ የሆነ ነገር አድርግ፡፡
  • ምን አደርጋለሁ ብለሽ ነው? ያው እጄን መስጠት ነው፡፡
  • እኔ እኮ በአንዴ ምንድነው የሚያልፈሰፍስህ?
  • ለመሆኑ የት ነው የተያዘው?
  • ኬላ ላይ ነዋ፡፡
  • ከአገር ሊወጣ ሲል?
  • ሰውዬ ምንድን ነው የምትቀባጥረው?
  • ተያዘ አልሽኝ አይደል እንዴ?
  • ታዲያ ከአሁን በፊትስ ስንቴ ተይዞ የለም እንዴ?
  • ምኑ? ደላላው?
  • የምን ደላላ ነው?
  • ማን ነው የተያዘው ታዲያ?
  • በኮንትሮባንድ የሚገባው ሞባይል ነው እንጂ፡፡
  • ኡፍፍፍ… እንዲያው ቆሌ የሚገፍ ነገር ቆሌሽን ይግፈፈው፡፡
  • ምን ሆነህ ነው?
  • እኔ እኮ ተያዘ ስትይኝ፣ ደላላው መስሎኝ እኔንም ይጠቁመኛል ብዬ ነው፡፡
  • ሞባይሉ ነው እባክህ የተያዘው፡፡
  • አሁን ለዚህ ነው ይኼን ሁሉ ስልክ የምትደውይው?
  • ሰውዬ ሞኝ ነህ እንዴ?
  • እንዴት?
  • ቴሌ ከውጭ የሚገባ ስልክ እንዲቀረጥ ማለቱን አልሰማህም እንዴ?
  • ታዲያ ምን ይጠበስ?
  • ከአንድ ሻንጣ የሚገርም ትርፍ ነዋ የምናገኘው፡፡
  • እኔ አሁን ራሴን ማረጋጋት እፈልጋለሁ፡፡
  • እኔ መረጋጋት አልቻልኩማ?
  • ራስሽን ማረጋጋት ነዋ፡፡
  • የምረጋጋው ሲለቀቅ ነው፡፡
  • ምኑ?
  • ስልኩ!

 

[ክቡር ሚኒስትሩ ግምገማ ተቀምጠዋል]

  • እንኳን ደህና መጡ ክቡር ሚኒስትር፡፡
  • እንኳን ደህና ቆያችሁኝ፡፡
  • ምነው አረፈዱ ክቡር ሚኒስትር?
  • መንገድ ተዘግቶብኝ ነው፡፡
  • ለመሆኑ በየትኛው መኪና ነው የመጡት ክቡር ሚኒስትር?
  • በቪ8ቱ ነዋ፡፡
  • መንግሥት አንድ መመርያ አውጥቶ ነበር፡፡
  • የምን መመርያ?
  • እንዲያውም መመርያው እርስዎን በቀጥታ ይመለከታል፡፡
  • የትኛው መመርያ ነው?
  • ቪ8 መኪና ለፊልድ ሥራ ብቻ ይዋል ተብሏል አይደል?
  • እሱንማ ሰምቻለሁ፡፡
  • ታዲያ ከተማ ውስጥ ለምንድነው በቪ8 የሚሄዱት?
  • በእግሬ አልሄድ እንግዲህ፡፡
  • ቀልድ አይደለም እኮ የያዝነው ክቡር ሚኒስትር?
  • አሁን ይህቺ መመርያ ቁም ነገር መሆኗ ነው?
  • አልገባኝም ክቡር ሚኒስትር?
  • ሁልጊዜ መንግሥት መመርያ ያወጣል ተተግብሮ ግን አያውቅም፡፡
  • አገር ውስጥ የሉም እንዴ ክቡር ሚኒስትር?
  • ከአገር ለመውጣትም እናንተኑ ማስፈቀድ እንዳለብኝ ተነግሮኛል?
  • ጥልቅ ተሃድሶ ውስጥ እንዳለን ረሱት?
  • እሱማ እኔም ከጥልቅ ተሃድሶ በኋላ ጥልቅ ሐዘን ውስጥ ገብቻለሁ፡፡
  • ለምን ክቡር ሚኒስትር?
  • በቃ እየተደረገ ያለው ዘመቻ አስፈርቶኛል፡፡
  • ምን አስፈራዎት?
  • በቃ ከዛሬ ነገ ያስገቡኛል እያልኩኝ እፈራለሁ፡፡
  • የሚፈሩ ከሆነ ታዲያ የመንግሥት መመርያን ለምን አያስፈጽሙም?
  • እ…
  • ወይስ የበሰበሰ ዝናብ አይፈራም ብለው ነው?
  • አልገባኝም? ምን እያላችሁኝ ነው?
  • ክቡር ሚኒስትር በሙስና ዘመቻው እያንዳንዱ ባለሥልጣን በመንግሥት ማይክሮስኮፕ ሥር እንደሆነ አያውቁም?
  • እ…
  • እያንዳንዱ ሹመኛ ምን እንደሚነዳ? ምን እንዳለው? ምን እንደሚያደርግ እናውቃለን፡፡
  • እ…
  • ክቡር ሚኒስትር ከተዘፈቁበት ሙስና ሊወጡ አልቻሉም፡፡
  • ጓዶች ወድጄ እኮ አይደለም?
  • ምን ማለት ነው?
  • ሙስና ደሜ ውስጥ ነው፡፡
  • ምን አሉ ክቡር ሚኒስትር?
  • እኔ እኮ ከእናንተ በላይ የሚረዳኝ የለም ብዬ ነው የማስበው፡፡
  • ለምንድነው የምንረዳዎት?
  • ያው ስለሱስ ከሱሰኛ በላይ ማን ሊረዳው ይችላል ብዬ ነዋ፡፡
  • ክቡር ሚኒስትር እናንተም ሙሰኞች ናችሁ እያሉን ነው?
  • መቼም ከሙስና የፀዳችሁ ናችሁ ብዬ አላምንም፡፡
  • የሚናገሩትን ነገር ያውቃሉ?
  • አሁን ጓዶች ሂስና ግለሂስ እንዳወርድ ይፈቀድልኝ?
  • እርስዎ እንዲያውም መውረድ ነው ያለብዎት፡፡
  • የት?
  • ወህኒ!

 

[ክቡር ሚኒስትሩ ከግምገማው እንደወጡ ለደላላ ወዳጃቸው ደወሉ]

  • ሄሎ ወዳጄ፡፡
  • ሄሎ ክቡር ሚኒስትር እንዴት ነዎት?
  • ምን ደኅንነት አለ ከአሁን በኋላ?
  • አልገባኝም ክቡር ሚኒስትር?
  • ሊያከተምልኝ ነው መሰለኝ?
  • እንዴት ክቡር ሚኒስትር?
  • ከግምገማ ወጥቼ ነው የማዋራህ፡፡
  • ጠንከር ያለ ግምገማ ነበር?
  • በጣም ጠንካራ ግምገማ ነበር፡፡
  • ታዲያ ችግር አለ?
  • ከችግርም በላይ ነው እንጂ፡፡
  • ይኼን ያህል ክቡር ሚኒስትር?
  • አዝማሚያው ደስ አላለኝም፡፡
  • እ…
  • በማይክሮስኮፕ እየታየሁ እንደሆነ ነው የተነገረኝ፡፡
  • እኛም አይቀርልንም በሉኛ?
  • እንግዲህ ማየት ነው፡፡
  • ለማንኛውም ሁልጊዜ የምንጠቀመው ስትራቴጂ እስከ ደም ጠብታ የሚለውን መሆኑን ያውቃሉ?
  • ምን እያልክ ነው?
  • እንደነገሩኝ ከቦታዎ ሊነሱ ይችላሉ፡፡
  • እሱማ እግዚአብሔር ከወደደኝ ነው፡፡
  • ከዚያ ውጪ ምን ይደረጋሉ?
  • ወደ ቂሊንጦም ልላክ እችላለሁ፡፡
  • ስለዚህ ለሁሉም መዘጋጀት አለብን ክቡር ሚኒስትር፡፡
  • ምን ይደረግ እያልክ ነው?
  • ክቡር ሚኒስትር ከቦታዎ ከመነሳትዎ በፊት ጥሩ ስትራቴጂ መቀየስ አለብን፡፡
  • የምን ስትራቴጂ?
  • እርስዎን ማቋቋም አለብን፡፡፡
  • ለነገሩ ከመንግሥት የተማርኩት ጥሩ የማቋቋሚያ ሥልት አለኝ፡፡
  • ምን ዓይነት ሥልት ክቡር ሚኒስትር?
  • ከባለሀብቶች ገቢ ማሰባሰብ ነዋ፡፡
  • ቴሌቶን ልናዘጋጅ?
  • ገንዘቡን የምናሰባስበው በቴሌቶን አይደለም፡፡
  • ታዲያ በምንድነው?
  • በኤስኤምኤስ!