Skip to main content
x
የሕወሓት ማዕከላዊ ኮሚቴ ስብሰባ ተቀምጧል

የሕወሓት ማዕከላዊ ኮሚቴ ስብሰባ ተቀምጧል

የገዥው ፓርቲ ኢሕአዴግ አባል ድርጅት ሕዝባዊ ወያኔ ሓርነት ትግራይ (ሕወሓት) ማዕከላዊ ኮሚቴ መደበኛ ስብሰባ፣ በመቐሌ ከተማ ማክሰኞ መስከረም 23 ቀን 2010 ዓ.ም. ተጀመረ፡፡

ከሕወሓት ማዕከላዊ ኮሚቴ አባላት በተጨማሪ ነባር አመራር አባላት ጭምር እየተሳተፉበት ነው በተባለው ለአራት ቀናት ቆይታ በሚያደርገው በዚህ ስብሰባ፣ ያለፈው ዓመት ዋነኛ የሚባሉ አፈጻጸሞች እንደሚገመገሙ ለማወቅ ተችሏል፡፡

በትግራይ ክልልም ሆነ በአገር አቀፍ ደረጃ በፖለቲካ፣ በኢኮኖሚና በማኅበራዊ ጉዳዮች ላይ በጥልቀት ውይይት ከመደረጉም በላይ፣ በተለይ ባለፈው ዓመት ተግባራዊ የተደረገው ጥልቅ ተሃድሶ አፈጻጸሙ ከእነ ውጤቶቹ በዝርዝር እንደሚታዩና የ2010 ዓ.ም. ዕቅድም ላይ ውይይት እንደሚደረግ ምንጮች ተናግረዋል፡፡

ከቅርብ ጊዜ ወዲህ በገዥው ፓርቲም ሆነ በመንግሥት ላይ እየተነሱ ባሉ ተቃውሞዎችና መሠረታዊ በሚባሉ የሕዝብ ጥያቄዎች ላይ ጥልቀት ያለው ውይይት እንደሚደረግ መረጃዎች ይጠቁማሉ፡፡

የሕወሓት ማዕከላዊ ኮሚቴ 45 አባላት ያሉት ሲሆን፣ በዚህ ስብሰባ የመጪው 13ኛ ድርጅታዊ ጠቅላላ ጉባዔ አጀንዳዎች እንደሚያደራጅ ይጠበቃል፡፡

የሕወሓት ሊቀመንበር አቶ ዓባይ ወልዱና ምክትላቸው ደብረ ጽዮን ገብረ ሚካኤል (ዶ/ር) በጋራ እየመሩት ባለው የማዕከላዊ ኮሜቲ ስብሰባ ላይ አቶ ስብሐት ነጋ፣ አቶ ሥዩም መስፍንና አቶ ዓባይ ፀሐዬን የመሳሰሉ ነባር አመራሮች በታዛቢነት መገኘታቸው ታውቋል፡፡